Darıǵa Nazarbaeva: Prezıdenttik testileý úreı týdyrmaýy tıis
ASTANA. QazAqparat - QR Parlamenti Senatynyń depýtaty Darıǵa Nazarbaeva buqaralyq sportty damytý boıynsha depýtattar usynystaryn jarııalady, dep habarlaıdy QazAqparat.
Senattyń jalpy otyrysynda «Dene tárbıesi jáne sport máseleleri boıynsha QR-dyń birqatar zańnamalyq aktilerine ózgertýler men tolyqtyrýlar engizý týraly» zań jobasy talqylanyp, eki oqylymda qabyldandy.
«Kóptegen sportshylar, onyń ishinde kásibı sportshylar Prezıdenttik testileý óte qıyn ekenin aıtýda. Sońǵy jyldary depýtattar birneshe ret Prezıdenttik testileýdi qıyndyq dárejesine qaraı birneshe sanatqa bólý týraly usynystardy kótergen bolatyn. Bul qadam adamdardyń sporttan alshaqtamaýyna, atalǵan testileý aldynda úreı týǵyzbas úshin qajet»,-dep toqtaldy senator.
Onyń sózine qaraǵanda, depýtattar Mádenıet jáne sport mınıstrligine QR Qarjy mınıstrligimen birlese kásibı, mamandandyrylǵan jáne buqaralyq sportty qarjylandyrý boıynsha bıýdjettik baǵdarlamalardy bólý máselesin qarastyrýdy usynyp otyr. Sonymen qatar kásibı sport klýbtaryna, balalar men jasóspirimder sport mektepterine salyqtyq jeńildikter usynǵan abzal.
Munymen qosa, sport sanattary boıynsha paıyzdyq deńgeıde bıýdjetten qarjylandyrý kólemin aıqyndaý máselesi atap ótildi. Bul turǵyda buqaralyq sportqa 30 paıyzdan kem emes deńgeıdi belgileý eskerilgen.
D. Nazarbaeva mektepterde sportqa baýlý sabaqtarynda birkelkilik joq ekenin atap ótti. Osy oraıda mektepte sportty damytýdyń baǵdarlamasyn ázirleý men sport túrleri boıynsha tizimdi bekitý usynyldy. Belgili bolǵandaı, mektepterdiń 60 paıyzynda dene shynyqtyrý boıynsha saǵattar sanyn arttyrý úshin jaǵdaı joq. Sondyqtan da jeke bıznesti tarta otyryp, sporttyq ınfraqurylymdy damytýdyń bólek baǵdarlamasy qajet bolyp tur.
