Darıǵa Nazarbaeva: Óz ómirińdi josparlaı alý - úlken baqyt
ASTANA. QazAqparat - QR Parlamenti Senatynyń depýtaty Darıǵa Nazarbaeva elimizde árbir azamat úshin beıbitshilik pen turaqtylyqtyń mańyzdy ekenin atap ótti, dep habarlaıdy QazAqparat tilshisi.
«Qazirgi ýaqyttyń talap-mindetteri qyzyq jáne qıyndyqtary da az emes. Biz beıbit elde ómir súrip jatyrmyz, munda turaqty bılik, turaqty saıasat, aldaǵy birneshe jylymyzdyń qalaı ótetinin shamamen baǵamdaı alamyz. Tipti, bilim alamyn, ári qaraı jumys isteımin, óz maqsattaryma jetemin dep óz ómirińdi josparlaı alýdyń ózi - úlken baqyt», - dedi senator áskerı-patrıottyq jumystardy jetildirýge arnalǵan vedomstvoaralyq kezdesýde. 
Kadet oqýshylary men áskerı-patrıottyq klýbtarda bilim alatyn balalarǵa depýtat maqsat qoıa bilý qajettigin jáne bul maqsattarǵa bilimdi, tártipti adamnyń ǵana qol jetkize alatynyn basa aıtty.
Sonymen birge, Darıǵa Nazarbaeva kezdesýge kelgen depýtattar men mınıstrler nazaryn jastardyń azamattyq paryzy men jaýapkershik sezimin qalyptastyrý máselesine aýdardy.
Onyń pikirinshe, bul baǵytta mektepterdegi áskerı-patrıottyq klýbtar mańyzdy ról atqarady.
«Bizge jas áskerı qurylymdardy memlekettik deńgeıde damytý men qoldaý boıynsha biregeı respýblıkalyq baǵdarlama qajet», - dep óz sózin tolyqtyrdy Darıǵa Nazarbaeva.
