Darıǵa Nazarbaeva: Osyndaı ótkinshi synaq kezinde ortaq múddemen ıgi isterde birge bolaıyq
NUR-SULTAN. QazAqparat – Parlament Senatynyń tóraǵasy Darıǵa Nazarbaeva halqymyz koronavırýs týyndatqan qıyndyqtyń bárin jeńetinine senim bildirdi, dep habarlaıdy QazAqparat tilshisi.
«Keshe Elbasynyń tereń ári shynaıy maqalasy jarııalandy. Qarapaıym ári bárine túsinikti, sonymen birge halyqqa senim men qýat syılaǵan maqala jaryqqa shyqty. Elbasy koronavırýs pandemııasy týyndatqan álemdegi jaǵdaıdy tereń taldap, azamattarymyzdyń densaýlyǵyn saqtaý, halyqty jáne eldiń ekonomıkasyn qoldaý jónindegi qabyldap jatqan sharalarǵa joǵary baǵa berdi», - dedi Darıǵa Nazarbaeva onlaın rejimde ótken Senat otyrysynda.
Senat tóraǵasynyń aıtýynsha, elimizdiń Tuńǵysh Prezıdenti atap ótkendeı, shyn máninde jaǵdaıdy turaqtandyrý úshin elde kóp jumys júrgizilgen.
«Bul baǵytta júıeli jumys jalǵasýda. Eń bastysy, qıyn synaq kezinde bir de bir azamat qoldaýsyz qalmaıtynyn túsiný kerek. Bul úshin memleketimizde qajetti resýrstardyń bári bar. Ókinishke qaraı, keıde uly ister nemese durys jumystar daǵdarys kezinde aıqyndala túsedi. Búgin de biz Elbasynyń Ulttyq qordy qurýdaǵy, ekonomıkany ártaraptandyryp, aýylsharýashylyǵy men ınfraqurylymdy damytýdaǵy kóregen saıasatynyń jemisin kórip otyrmyz. Osy ister memlekettiń, ekonomıkalyq jáne áleýmettik júıeniń negizgi turaqtylyǵyn qamtamasyz etetin «qaýipsizdik jastyqshasyn» qalyptastyrdy», - dedi ol.
Darıǵa Nazarbaeva sonymen qatar halqymyz koronavırýs týyndatqan qıyndyqtyń bárin jeńerine senim bildirdi
«Elbasy el basshylyǵynyń daǵdarysqa qarsy sharalaryn tolyǵymen qoldap, bárimizdi Prezıdent Qasym-Jomart Kemeluly Toqaevty jáne Úkimetti qoldaýǵa shaqyrdy. Keshegi Elbasynyń Joldaýy daǵdarysqa qarsy is-qımylymyzǵa jańa serpin beretinin aıtsam, senatorlardyń bári bul pikirimdi qoldar degen úmittemin. Osy qıyn kezeńde qazaqstandyqtar úshin qoǵamdaǵy birlik pen kelisimdi saqtaý óte mańyzdy. «Birlik túbi - bereke» deıdi dana halqymyz. Endeshe osyndaı ótkinshi synaq kezeńinde bir maqsat, ortaq múddemen ıgi isterde birge bolaıyq», - dedi ol.
