Darıǵa Nazarbaeva: Myqty armııa soǵys úshin emes, qorǵanys úshin qajet
ALMATY. QazAqparat - Almatyda Darıǵa Nazarbaeva bastaǵan birqatar senatorlar QR UQK Shekara qyzmeti akademııasynda boldy. Oqý ornymen tanysý barysynda senator basshylyqpen ashyq áńgime bolǵanyn, aldaǵy ýaqytta qajetti kómek kórsetiletinin aıtty, dep habarlaıdy QazAqparat tilshisi.
Aıta keteıik, qyrkúıektiń 18-19 kúnderi QR Parlamenti Senatynyń Halyqaralyq qatynastar, qorǵanys jáne qaýipsizdik komıteti memlekettik shekara kúzeti máseleleri boıynsha kóshpeli keńes ótkizdi. Darıǵa Nazarbaeva bastaǵan birqatar senatorlar Almaty men Almaty oblysyndaǵy áskerı oqý oryndary men shekara, keden beketterinde boldy. Búgin Qurlyq áskerleriniń áskerı ınstıtýty jumysymen tanysqannan keıin, kóshpeli keńes QR Ulttyq qaýipsizdik komıteti shekara qyzmeti akademııasynda bolyp, onda depýtattar kýrsanttar men oqytýshy qurammen kezdesti.
Akademııada senatorlar Qarý-jaraq oqý kafedrasy, kınologııa men shekara beketinen ótkizý pýnktinde boldy. Akademııa jumysymen tanysqan Darıǵa Nazarbaeva oqý orny basshylarymen ashyq sóıleskenin aıtty. 
«Oqý orny jattyǵý quraldary, qarý-jaraqtarmen qamtamasyz etilgen. Kýrsanttar jańa metodıkamen daıyndalýda. Bul - 85 jyldyq tarıhy bar oqý orny. Biz óz tarapymyzdan zań jaǵynan, sosyn kúzde qarajat máselesin qaraımyz, sol kezde kómek kórsetemiz dep oılaımyz», -dedi senator.
Sonymen qatar, ol búgingi sarbaz elektronıkalyq qarý jabdyqtaryn ǵana emes, eski tehnıkany da jaqsy meńgergenimen baǵaly ekenin aıtty.
«Qazirgi ýaqytta damyǵan elderdiń qarýly kúshteri qymbat tehnıkalar men elektronıkamen jabdyqtalýda. Men qarýly kúshterimiz de, sarbazdarymyz da kompıýterdi, aqparattyq tehnologııany ıgerip, barynsha elektronıkamen jabdyqtalýy kerek degen pikirdemin. Sardarlarmen sóıleskenimde olar búgingi sarbaz elektronıkany da, balama tehnıkany da ıgerýi qajet degen pikir aıtty. Sebebi, qarýly jattyǵý kezinde elektronıka ózin únemi jaqsy jaǵynan kórsete bermeıdi. Sondyqtan, tıimdiligi joǵary eski tehnıkalardy da ıgerý mańyzdy. Elimizdiń qorǵanys qabiletin arttyrý óte úlken qarajatty qajet etetinin bilemiz. Myqty armııa soǵys úshin emes, qorǵanys úshin qajet» - dedi senator.
Senatorlar sonymen qatar Qurlyq áskerleriniń áskerı ınstıýtymen tanysty.
