Darıǵa Nazarbaeva: Múmkindigi shekteýli balalalardy qoldaýǵa qoǵam bolyp jumylý kerek
NUR-SULTAN. QazAqparat Parlament Senatynyń tóraǵasy Darıǵa Nazarbaeva ınklıýzıvti bilim berý deńgeıiniń tómendigi men damýynda erekshelikteri bar balalarǵa arnalǵan ınfraqurylymnyń joqtyǵy týraly másele kóterdi, dep habarlaıdy QazAqparat Parlament Senatynyń baspasóz qyzmetine silteme jasap.
Múgedektigi bar adamdar quqyqtaryn qamtamasyz etý jáne ómir súrý sapasyn jaqsartý boıynsha usynystar ázirleý jónindegi jumys toby jumysynyń nátıjesi týraly aqparat kún tártibindegi birinshi másele boldy. Otyrys barysynda Áleýmettik-mádenı damý jáne ǵylym komıtetiniń tóraǵasy Murat Baqtııaruly múgedektigi bar adamdar quqyqtaryn qamtamasyz etý jáne ómir súrý sapasyn jaqsartý jóninde 62 usynys ázirlengenin atap ótti.
«Barlyq usynystardyń 42-si zańnamalyq aktilerge, 20-sy zańnan keıingi aktilerge ózgerister men tolyqtyrýlar engizý týraly boldy», - dedi M.Baqtııaruly.
Senat Tóraǵasy óz kezeginde jınalǵan usynystardy barshaǵa ortaq talqylaý úshin aqparattyq resýrstarda jarııalaý qajettigin atap ótti.
«Zańdardy, normatıvterdi, ádistemelerdi jaqsartý jáne osy qujattardy jumys istetý, jaýapkershilikti kúsheıtý úshin barlyq múmkindikti jasaý – Siz ben bizdiń mindetimiz. Bul asa mańyzdy ári aýqymdy jumysqa eń sońynda búkil qoǵamdy tartý kerek. Sebebi bul tek memleket pen áleýmettik qyzmetterdiń ǵana mindeti emes. Kóp nárse árkimniń kózqarasyna baılanysty ári bárimiz de adambyz», - dedi Darıǵa Nazarbaeva.
Senat Tóraǵasy ınklıýzıvti bilim berý deńgeıiniń tómendigin, damýynda erekshelikteri bar balalarǵa arnalǵan qajetti ınfraqurylymnyń joqtyǵyn da atap ótti.
«Qalalyq kólik te solardyń qatarynda. Biz bıýdjet qarjysyn qalalyq kólik satyp alýǵa jumsaıtyn bolsaq, onda múmkindigi shekteýli adamdar da osy kólikti paıdalana alatyndaı tıisti tehnıkanyń bolǵany mindetti bolýy tıis. Bul temirjol kóligi men áýe qatynasyna da qatysty», - dedi Palata basshysy.
Bıýro músheleri Senattyń 6 aqpanda ótetin kezekti otyrysynyń kún tártibi boıynsha usynystardy da qarady. Otyrysta Salyq kelisimderine qatysty sharalardy oryndaý jónindegi kópjaqty konventsııany, ShYU-nyń ekstremızmge qarsy is-qımyl jónindegi konventsııasyn, tunshyqtyrǵysh, ýly nemese basqa da uqsas gazdar men bakterıologııalyq quraldardy soǵysta qoldanýǵa tyıym salý týraly hattamany ratıfıkatsııalaý týraly zań jobalaryn qaraý josparlanýda.
Senatorlar Parlament Májilisinde maquldanǵan zań jobalaryn bólip berdi. Senattyń Ekonomıkalyq saıasat, ınnovatsııalyq damý jáne kásipkerlik komıteti «Dúnıejúzilik poshta odaǵynyń Jarǵysyna Toǵyzynshy qosymsha hattamany ratıfıkatsııalaý týraly» zań jobasy boıynsha qorytyndyny odan ári pysyqtaý jáne daıyndaý jónindegi bas komıtet bolyp belgilendi.
«Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy zańsyz kóshi-qonǵa qarsy kúrestegi yntymaqtastyq týraly kelisimdi bekitý týraly» zań jobasy boıynsha Senattyń basqa komıtetteriniń usynystaryn qorytý jáne qorytyndy ázirleý Halyqaralyq qatynastar, qorǵanys jáne qaýipsizdik komıtetine tapsyryldy.
Sonymen qatar, bıýro otyrysynda parlamenttik tyńdaýlarǵa ázirlik jáne ótkizý týraly másele qaraldy.
28 aqpanda «Agroónerkásiptik keshendi damytý máseleleri» taqyryby boıynsha tyńdaý ótkizý josparlandy, al naýryz aıynyń basynda «Qazaqstannyń jeńil ónerkásibi: ónimdiligi joǵary bıznestiń qazirgi jaǵdaıy men damý bolashaǵy» jáne «Qazaqstannyń tranzıttik áleýetin damytý» atty tyńdaýlar ótedi.
