Darıǵa Nazarbaeva muǵalimderdi merekemen quttyqtap, alǵys aıtty

  ASTANA. QazAqparat - Astanada EKSPO aýmaǵyndaǵy «Hol-Energııa» pavılonynda ótip jatqan Muǵalimder kúnine arnalǵan saltanatty is-sharada Parlament Senatynyń depýtaty Darıǵa Nazarbaeva ustazdar qaýymyn merekesimen quttyqtap, úzdik pedagogtardy marapattady, dep habarlaıdy QazAqparat tilshisi.

«Qurmetti pedagogtar men ardager ustazdar! Búgin bárimiz úshin qýanyshty kún. Óıtkeni, bilim salasynda eńbek etip júrgen ustazdarǵa eldiń aıtar alǵysy sheksiz. Búgin sizderdi quttyqtaı otyryp, eńbekterińizge tabys tileımin. Bizdiń balalardyń, Otannyń taǵdyry sizderdiń qoldaryńyzda desek, artyq aıtqandyq emes. Sizder uly eńbekti atqaryp jatyrsyzdar», - dedi senator óziniń quttyqtaý sózinde.

Darıǵa Nazarbaeva eńbekterin adal atqaryp júrgen barlyq ustazdar qaýymyna alǵysyn bildirdi.

«Biz az ýaqyt buryn bilim týraly memlekettik baǵdarlamany qorǵaǵan kezde báriniń kókeıinde aǵylshyn tilin engizý, aǵylshyn tilindegi pánderdi oqytý máselesi bar edi. Bul úlken asý bolatyn. Atalǵan  baǵdarlama boıynsha jumys júrgizgen adamdar bastamanyń qanshalyqty qıyn ári kúrdeli ekenin jaqsy túsindi. Bul sizderge qanshalyqty aýyr bolatynyn da bildik. Mınıstrmen (Erlan Saǵadıev - avt.) kezdesken saıyn men jumystyń qalaı atqarylyp jatqanyn árdaıym surap júremin. Osy oraıda jumystyń sátti atqarylyp jatqanyn aıta ketkim keledi», - dedi Parlament Senatynyń depýtaty.

Darıǵa Nazarbaevanyń aıtýynsha, qazirgi tańda muǵalimder aǵylshyn tilin meńgerip qana qoımaı, oqýshylardy da daıyndaý ústinde.

«Meniń oıymsha, alǵashqy asýlardy baǵyndyrǵan sekildimiz. Úsh tildiń bolǵany óte mańyzdy. Týǵan tilimiz qazaq tilin, ultaralyq qarym-qatynas tili - orys tilin jáne bolashaqta róli erekshe aǵylshyn tilin bilýdiń mańyzy zor. Sondyqtan, qurmetti ustazdar, sizderdiń asqan tózimderińiz úshin taǵy da alǵys aıtqym keledi», - dedi Darıǵa Nazarbaeva.

Atalmysh shara aıasynda «Úzdik pedagog» respýblıkalyq konkýrs jeńimpazdaryn saltanatty marapattaý rásimi ótti. Darıǵa Nazarbaevanyń qolynan atalmysh ataqty Astana qalasyndaǵy «Zerde» daryndy balalarǵa arnalǵan № 9 mekteptiń matematıka pániniń muǵalimi Kúshaı Terdikbaı, Astana qalasyndaǵy № 68 orta mekteptiń tarıh jáne quqyq pániniń muǵalimi Janar Sabanbaeva, Astana qalasyndaǵy Balalar men jasóspirimderdiń týrızm jáne ólketaný ortalyǵynyń geografııa jáne qosymsha bilim berý muǵalimi Qabanbaı Jaqypov, Astana qalasyndaǵy № 22 mekteptiń matematıka pániniń muǵalimi Lázzat Ibraeva aldy. Jeńimpaz muǵalimderge 2,4 mln teńgeniń sertıfıkaty tabystaldy.