Darıǵa Nazarbaeva: Memlekettik organdardyń baspasóz qyzmetteriniń jumysynda kemshilik bar
ASTANA. QazAqparat - Memlekettik organdardyń baspasóz qyzmetteriniń jumysynda kemshilikter bar. Bul týraly búgin «Jas qalam» forýmynyń ashylýynda QR Parlamenti Senatynyń depýtaty, QR Tuńǵysh Prezıdenti qorynyń dırektory Darıǵa Nazarbaeva aıtty, dep habarlaıdy QazAqparat tilshisi.
«Árbir mınıstrliktiń, ákimdiktiń janynda baspasóz qyzmetti bar. Biraq, ókinishke oraı kásibı daǵdylary jetkiliksiz nemese ýaqyttary jete bermeıdi. Bul jumystarǵa qazir úsh degen baǵa qoıýǵa bolady, ondaı problema bar. Teledıdar aldynda otyrǵan qarapaıym kórermen mınıstr devalvatsııa, ınflıatsııa, naryqtaǵy qubylmalylyq, targetteý jaıynda aıtyp jatsa ne túsine alady? Munyń barlyǵy da sheteldik sándi ádemi sózderi», - dedi forým aıasynda BAQ ókilderine suhbat bergen senator.
Onyń aıtýynsha, mundaı kásibı til shaǵyn aýdıtorııamen jumys istegen kezde qajet.
«Biraq, dáriger, muǵalim, zeınetker, mektep oqýshysy, stýdent bar keń aýdıtorııamen basqa tilde sóılesken jón», - dedi Darıǵa Nazarbaeva.
Sonymen qatar ol Parlamentke keletin keıbir sheneýnikterdiń zańdy qarapaıym tilmen túsinikti jetkize almaıtyndyǵyn da basa aıtty.
Buǵan deıin habarlaǵanymyzdaı, Darıǵa Nazarbaeva qazirgi tańda jýrnalıstıka kóp qyzyǵýshylyq tanytylatyn mamandyqtardyń biri ekendigin aıtqan bolatyn.
Sondaı-aq ol búgingi jýrnalıster sheneýnikterdiń «qus tilin» jalpy buqaraǵa jetkize bilýleri kerektigin atap ótti.
Al QR Aqparat jáne kommýnıkatsııalar mınıstri Dáýren Abaev myqty jýrnalıst bolý úshin kóp izdenis, tájirıbe qajet ekendigin atap ótken edi.
Aıta keteıik, qazaqstandyq jýrnalıstıkany damytýǵa jas jýrnalısterdiń kásibı biliktiligin arttyrýǵa baǵyttalǵan keń aýqymdy «Jas qalam» jobasyna 100-den astam jýrnalıst qatysýda. Olardyń qatarynda jýrnalıstermen qatar jýrnalıstıka fakýltetiniń stýdentteri, sondaı-aq buqaralyq aqparat quraldaryna qyzyǵýshylyq tanytatyn jastar da bar.
