Darıǵa Nazarbaeva: Quqyqqorǵaý organdary óz qataryndaǵy jemqorlyqpen kúresýi tıis
ASTANA. QazAqparat - Parlament Senatynda Qazaqstan Respýblıkasynyń 2015 - 2025 jyldarǵa arnalǵan Sybaılas jemqorlyqqa qarsy strategııasyn iske asyrý máseleleri talqylandy, dep habarlaıdy QazAqparat palatanyń resmı saıtyna silteme jasap.
Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov sybaılas jemqorlyqqa qarsy júıeli sharalar týraly baıandady. Ol memlekettik apparattyń kásibı sıpatqa kóshýimen qatar sheneýnikterdiń azamattarmen tikeleı baılanystary eleýli túrde qysqarǵanyn jáne sybaılas jemqorlyq kórinisterine qolaıly jaǵdaılar azaıǵanyn atap ótti.
Jalpy alǵanda, halyqqa qyzmet kórsetý ortalyqtary arqyly 83 paıyz qyzmet elektrondy túrde, onyń ishinde 63 paıyzy «elektrondyq úkimet» portaly arqyly kórsetiledi. Málimetter bazasyn kiriktirý 2,5 ese ósip, 30 paıyzdy qurady.
Aǵartýshylyq jumystar arqyly azamattyq qoǵamdy sybaılas jemqorlyqpen belsendi túrde kúreske tartý jáne onyń kez kelgen kórinisterine tózbeýshilik ahýalyn qalyptastyrý júzege asýda. O.Bektenov senatorlarǵa Astanada iske qosylǵan «Qoǵamdyq baqylaýdyń ınteraktıvti kartasy» týraly aıtyp berdi. Karta qurylys, jóndeý jumystary, ınfraqurylymdar jáne áleýmettik nysandardy kútip ustaý shyǵyndary týraly naqty ýaqyttaǵy derekterdi kórsete alady. Karta jergilikti bıýdjetti iske asyrýdy kórsetýge jáne baǵalaýǵa, saýaldar berý men shaǵymdar aıtýǵa, sondaı-aq keri baılanysqa shyǵýǵa múmkindik beredi.
Senator Muhtar Qul-Muhammed osy jobany elimizdiń barlyq aımaqtaryna keńinen taratýdy usyndy. Ony tıimdi iske asyrý úshin arnaıy baǵdarlama ázirlep, birneshe satyǵa bólý kerektigi aıtyldy.
Sondaı-aq otyrys barysynda halyqty keń jolaqty ınternetpen qamtýǵa bólingen bıýdjet qarjysynyń tıimdi jumsalý máselesi qyzý pikirtalas týdyrdy. Senator Talǵat Musabaevtyń aıtýynsha, ol úshin talshyqty-optıkalyq qymbat baılanys jelisin emes, KazSat-2 jáne KazSat-3 jer serikterin paıdalaný oryndy bolar edi.
Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva «Tsıfrlyq Qazaqstan» baǵdarlamasyna bólingen qarjyny jumsaý boıynsha qoǵamdyq monıtorıng júıesin jasaýdy usyndy. Senatorlar memlekettik organdardaǵy, onyń ishinde ІІM júıesi, salyq qyzmeti, keden, kólik salasyndaǵy sybaılas jemqorlyq derekterine alańdaýshylyq bildirdi.
Senator D.Nazarbaevanyń pikirinshe, birinshi kezekte quqyqqorǵaý organdary óz ishindegi sybaılas jemqorlyqpen kúresýileri tıis. Sondaı-aq memlekettik organdardaǵy ózara baqylaý júıesin qurý jáne zańnamalyq aktilerge sybaılas jemqorlyq turǵysynda júıeli taldaý jasaý kerek.
