Darıǵa Nazarbaeva koronavırýspen kúreste aldyńǵy shepte júrgen azamattardyń bárine alǵys aıtty
NUR-SULTAN. QazAqparat – Parlament Senatynyń tóraǵasy Darıǵa Nazarbaeva koronavırýs indetimen kúreste aldyńǵy shepte júrgen azamattardyń bárine alǵys aıtty, dep habarlaıdy QazAqparat tilshisi.
«Kez kelgen daǵdarys árqashan memlekettiń beriktigin, qoǵamnyń birligi men azamattyń adamı qundylyqtaryna túsetin synaq ispetti. Senatorlardyń jáne ózimniń atymnan qıyn kezeńde judyryqtaı jumylyp, birlik tanytyp otyrǵan Qazaqstan halqyna, túsinistik pen shydamdylyq tanytyp otyrǵan eldiń ár azamatyna shyn júrekten alǵys aıtamyn. Men jaqyndary jáne týystarynan aırylǵan otbasylardyń bárine qaıǵyryp kóńil aıtamyn. Naýqastardyń tezirek jazylyp ketýin tileımin! Búgingi tańda medıtsınalyq mekemelerdiń, quqyq qorǵaý organdarynyń qyzmetkerleri, áskerı qyzmetkerler jáne eriktiler shıelenisken tusta jumysyn jalǵastyryp jatyr. Qazir olardyń bárine de ońaı emes. Óıtkeni olar aýrýhanalar men juqpaly aýrýlar bólimshelerinde, joldar men kóshelerde qorǵanysty ustap tur. Olar emdeıdi, adamdardyń ómirin saqtaıdy, vırýstyń taralýyna jol bermeı, tártip pen qaýipsizdikti qamtamasyz etedi, kúndelikti erlik kórsetedi», - dedi Darıǵa Nazarbaeva onlaın rejimde ótken Senat otyrysynda.
Senat tóraǵasy osy qıyn-qystaý kúnderde olardyń bári de kópke úlgi bolyp otyrǵanyn jetkizdi.
«Meniń oıymsha búgin árbir qazaqstandyq aldyńǵy shepte turǵandarǵa aıtqan alǵysyma qosylatynyna senimdimin. Máslıhat depýtattaryna da erekshe alǵys bildirgim keledi. Olar óńirlerdiń áleýmettik-ekonomıkalyq turaqtylyǵyn saqtaý úshin barlyq múmkindikti jasaýda. Qıyn jandarǵa qaıyrymdylyq kómek kórsetetin kásipkerlerge - olardyń jomarttyǵy, azamattyq pozıtsııasyna, qarjylyq qoldaý kórsetkenine alǵys aıtamyz», - dedi ol.
