Darıǵa Nazarbaeva QHR elshisin qabyldady
Senat spıkeri kezdesýdi asha kelip Qytaımen strategııalyq jan-jaqty áriptestik qarym-qatynastyń erekshe mańyzyn atap ótti.
«Qazaqstan Elbasy N.Nazarbaev pen QHR Tóraǵasy Sı Tszınpınniń joǵary deńgeıdegi dostyq, tatý kórshilik jáne ózara túsinistik negizindegi kelisimderin júzege asyrýdy jalǵastyrýǵa nıetti. Strategııalyq jan-jaqty áriptestik qarym-qatynastaryn nyǵaıtý baǵytyn ustanatynymyzdy naqtylaımyz», - dedi D. Nazarbaeva.
Chjan Sıao QHR Halyq ókilderi Búkilqytaılyq jınalysy Turaqty komıtetiniń tóraǵasy Lı Chjanshýdyń D. Nazarbaevaǵa Senat tóraǵasy qyzmetine saılanýymen quttyqtaýyn jetkizdi jáne budan bylaıǵy jumysy tabysty bolýyna tilektestigin bildirdi.
«Biz Sizdiń parlamentaralyq baılanystardy damytýǵa jáne Qytaıdyń «Bir beldeý, bir jol» bastamasyn qoldaýǵa qosqan jeke úlesińizdi joǵary baǵalaımyz», - dedi ol.
Qytaı elshisi Qazaqstannyń Tuńǵysh Prezıdenti N. Nazarbaevtyń 2-shi halyqaralyq «Bir beldeý, bir jol» yntymaqtastyǵy forýmyna qatysý úshin Beıjiń qalasyna baratyn aldaǵy saparyna daıyndyq týraly Senat basshysyn habardar etti.
Taraptar saýda-ekonomıkalyq baılanystardy damytýdaǵy oń úrdister men bizdiń elderimiz arasyndaǵy taýar aınalymy kóleminiń ósýin atap ótip, ınvestıtsııa, aýyl sharýashylyǵy, týrızm, mádenı-gýmanıtarlyq yntymaqtastyq salasyndaǵy ózara is-qımyldy kúsheıtý múmkindikteri bar ekenine toqtaldy.
Senat basshysy eki el arasyndaǵy jastar yntymaqtastyǵyn belsendi damytý, atap aıtqanda, stýdentter almasýdy jáne bilim granttaryn berýdi jolǵa qoıý qajettigin atap ótti.
D. Nazarbaeva Shyńjań-Uıǵyr avtnomııalyq ólkesindegi qazaqtar taqyrybyn qozǵaı kelip, QHR-daǵy etnıkalyq qazaqtar Qazaqstan men Qytaı arasyndaǵy qarym-qatynasta «dostyq kópiri» ekenin atap ótti. Taraptar osy salada týyndaıtyn máselelerdi ózara negizde syndarly túrde sheshýge ýaǵdalasty.
Kezdesý barysynda Senat spıkeri Qazaqstan azamattary úshin týrıstik jáne jeke vıza berýdi jańǵyrtý máselesin kóterdi.