Darıǵa Nazarbaeva: Qazaqstan bıznesi EAEO aıasyndaǵy saýdada negizsiz shekteýlerge tap bolýda
Sharaǵa Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed, Ekonomıkalyq saıasat, ınnovatsııalyq damý jáne kásipkerlik komıtetiniń hatshysy Dáýren Ádilbekov, EAEK Alqa tóraǵasynyń hatshylyq jetekshisi Vladımır Zınovskıı, syrtqy ister mınıstriniń orynbasary Marat Syzdyqov qatysty.
D.Nazarbaeva óz sózinde Mıhaıl Mıasnıkovıchti Eýrazııa ekonomıkalyq komıssııa Alqasynyń tóraǵasy bolyp taǵaıyndalýymen quttyqtady jáne jumysynyń tabysty ári nátıjeli bolýyna tilektestigin bildirdi.
Kezdesý barysynda EAEO-ǵa qatysýshy memleketterdiń odaq aıasyndaǵy kelisimderdiń oryndalýyn qamtamasyz etýdiń ózekti máseleleri men Eýrazııalyq odaq elderimen saýda barysynda qazaqstandyq bıznes tap bolatyn kedergiler talqylandy.
Senat basshysy búgingi tańda EAOE-nyń ishki naryǵy aıasyndaǵy kedergilerdi joıý úshin josparly túrde ilgerileý kerektigin atap ótti.
«Atqarylǵan jumystarǵa qaramastan, kedergiler men tosqaýyldar azaıǵan joq, qaıta kóbeıe túsýde. Búginde kelisilgen kedergiler tizilimi 66 tarmaqtan turady. Kezinde bul tizilim 60-tan bastalatyn. Bul kórsetkishti azaıtýdyń ornyna, biz jyl sanap jańa kedergiler jasap nemese burynǵylardy joıa almaı, sanyn kóbeıtip otyrmyz», - dedi D. Nazarbaeva.
Qazaqstan taýarlarynyń Reseı naryǵyna qol jetkizýdegi kedergiler, qazaqstandyq birqatar taýar ónimderi tranzıtine tyıym nemese shekteý qoıý, elektrondy deklaratsııalaý qaǵıdatynyń saqtalmaýy, belgili bir taýarlardy jetkizýde túrli talap qoıý arqyly kedergilerdi tehnıkalyq retteýmen búrkemeleý máselesi otandyq bıznestiń aldyndaǵy negizgi qıyndyqtardyń biri retinde atap ótildi.
EAEK Alqasynyń Tóraǵasy elimizdegi Armenııadan ákelingen avkólikter máselesin qozǵady. «Bul jerde rásimder durys saqtalmaǵan dep oılaımyn. Jeke tulǵalardyń Eýrazııalyq ekonomıkalyq odaq aıasyndaǵy avtokólik tasymaldaýy boıynsha Armenııa jeńildik tártibine ıe bolǵan edi. 1 qańtardan bastap ol jeńildik joıyldy. Biraq, shekara aımaǵynda nemese jolda jetpeı qalǵan avtokólikter bar», - dedi ol.
Mıhaıl Mıasnıkovıch Eýrazııalyq ekonomıkalyq odaq aıasynda qol qoıylǵan 25-ke jýyq kelisim men sharttar búgingi kúnge deıin ratıfıkatsııalanbaı otyrǵanyna nazar aýdardy. Sonymen qatar alqa basshysy ekonomıkalyq daýlardy sheshý úshin EAEK-nyń sotqa júginý quqyǵynyń bolýy kerektigin jáne EAEK arbıtrajyn qurý qajettigin atap ótti.
D.Nazarbaeva atalǵan bastamaǵa qoldaý bildirdi jáne sheshimderdi qabyldaý rásimi tym bıýrokratııalanǵany men onyń uzaq ýaqytqa sozylatynyn aıtty.
Senat Tóraǵasy sondaı-aq qazaqstandyq aýyr júk kólikterin júrgizýshilerdiń Reseı-Belarýs shekarasyndaǵy problemalaryna erekshe toqtaldy. «Odaqtyq memleketterdiń is-qımyly boıynsha bul shekarada halyqaralyq tekserý beketiniń bolmaýyna baılanysty shekaradan tek Reseı jáne Belarýs eliniń azamattary ǵana óte alady. Búgingi kúni qazaqstandyq júrgizýshilerge shekaradan ótýge ýaqytsha ruqsat bar, degenmen onyń ózi rettelmegen túrde», - dedi D. Nazarbaeva.
