Darıǵa Nazarbaeva Qaterli isikpen kúres kóshbasshylarynyń sammıti aıasynda birqatar kezdesýler ótkizdi
NUR-SULTAN. QazAqparat - Parlament Senatynyń tóraǵasy, Qazaqstan Respýblıkasynyń Tuńǵysh Prezıdenti qorynyń dırektory Darıǵa Nazarbaeva Nur-Sultanda ótip jatqan Qaterli isikpen kúres kóshbasshylarynyń dúnıejúzilik sammıti aıasynda birqatar kezdesýler ótkizdi, dep habarlaıdy QazAqparat joǵary palatanyń baspasóz qyzmetine silteme jasap.
Joǵarǵy palata basshysy Iordanııa Hashımıt Koroldiginiń patshaıymy, Qaterli isikti halyqaralyq baqylaý odaǵynyń prezıdenti Dına Mıredpen kezdesti. Taraptar Tuńǵysh Prezıdent Qorynyń jáne Korol Hýseınniń Obyrmen kúres qorymen yntymaqtastyq múmkindikterin talqylady.
«Tuńǵysh Prezıdent Qory densaýlyq saqtaý jáne jastardyń ǵylymı zertteýlerimen birge túrli baǵyttardaǵy jobalardy qarjylandyrady. Qordyń dırektory retinde bizdiń uıymdardyń yntymaqtastyq múmkindikterin qarastyrýdy usynamyn. Biz onkologııa máselelerin zertteý salasyndaǵy jumysymyzdy kúsheıtýge yqylastymyz», - dedi Darıǵa Nazarbaeva.
Sondaı-aq Senaty tóraǵasy sammıt aıasynda Túrik Respýblıkasynyń birinshi hanymy Emıne Erdoǵanmen júzdesti.
Darıǵa Nazarbaeva ulttyq jáne álemdik aýqymdaǵy onkologııalyq syrqattardy zertteý, dıagnoz jasaý jáne emdeýdiń mańyzdylyǵyn atap óte kelip, sharaǵa qatysqany úshin alǵysyn bildirdi.
Emıne Erdoǵan óz kezeginde sammıttiń uıymdastyrý deńgeıin joǵary baǵalap, densaýlyq saqtaý salasyndaǵy ekijaqty yntymaqtastyqty qalyptastyrýdy usyndy.
«Qazaqstan men Túrkııany dostyq jáne baýyrlastyq qarym-qatynastar ǵana emes, áriptestik qatynastar da baılanystyrady. Bizdiń elderimiz kóptegen salalar boıynsha nátıjeli yntymaqtasyp keledi. Sondyqtan sammıttiń qorytyndysy boıynsha medıtsına salasyndaǵy yntymaqtastyq pen ózara tıimdi baılanystardyń nyǵaıatynyna senimdimin», - dep atap ótti Túrkııa Respýblıkasynyń birinshi hanymy Emıne Erdoǵan.
Darıǵa Nazarbaevanyń Býrkına-Fasonyń birinshi hanymy Adjovı Sıka Kaboremen kezdesýi de Qaterli isikpen kúres kóshbasshylarynyń dúnıejúzilik sammıti aıasynda boldy.
Senat Tóraǵasy júzdesý barysynda Qazaqstanda onkologııalyq aýrýlarmen kúres boıynsha qabyldanyp jatqan sharalar týraly málim etti. D. Nazarbaevanyń aıtýynsha, Elbasynyń tapsyrmasy boıynsha 2018-2022 jyldarǵa arnalǵan joǵary tehnologııalyq medıtsınalyq qyzmetterge qoljetimdilikti ulǵaıtý, dıagnostıka men emdeýdiń ınnovatsııalyq ádisterin engizý, kadrlyq resýrstardy damytý, onkologııa salasyndaǵy irgeli jáne qoldanbaly ǵylymı zertteýlerdiń keshendi jospary bekitilgen bolatyn.
Adjovı Sıka Kabore óz kezeginde azamattardyń densaýlyǵyn saqtaý boıynsha birlesken jumystyń mańyzdylyǵyn atap ótti. Birinshi hanym onkologııalyq aýrýlarǵa qarsy kúres salasyndaǵy Qazaqstannyń tájirıbesin úırenýge ázirlikterin bildirdi.
