Darıǵa Nazarbaeva frantsýz parlamentshisine konstıtýtsııalyq reforma týraly áńgimeledi
ASTANA. QazAqparat - Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva Frantsııa Ulttyq Assambleıasynyń depýtaty Terı Marıanımen kezdesti.
D. Nazarbaeva meımanǵa Prezıdent ókilettiginiń bir bóligin zań shyǵarý jáne atqarýshy bılik tarmaqtaryna berýdi kózdeıtin Qazaqstandaǵy konstıtýtsııalyq reformalar týraly, sondaı-aq Úkimettiń Parlament aldynda eseptiligin arttyrý týraly áńgimeledi. Bıylǵy jylǵy Frantsııada bolatyn prezıdent saılaýy týraly pikir almasyldy.
T. Marıanı Eýrazııadaǵy ıntegratsııalyq úrdisterge nazar aýdardy. Osyǵan baılanysty D. Nazarbaeva EAEO men Eýropalyq Odaq arasyndaǵy dıalogtyń óristeýine úmit artatynyn, ol ekonomıkalyq, saýda jáne gýmanıtarlyq baılanystardy damytýǵa oń yqpal etetinin jetkizdi.
Kezdesý barysynda eki memleket betpe-bet kelip otyrǵan terrorızm máselesine de nazar aýdaryldy. D. Nazarbaeva bul qatermen Qazaqstanda qalaı kúres júrip jatqany týraly habardar etti. Frantsýz parlamentshisi Qazaqstan mektepteriniń tájirıbesin, jastarǵa teris nasıhat júrgizýdiń aldyn alýǵa múmkindik beretin tarıh pen dintaný negizderin oqý baǵdarlamasymen tanysýǵa yqylasty ekenin jetkizdi. Sondaı-aq quqyqtyq máseleler, atap aıtqanda Taıaý Shyǵystaǵy terrorıstik toptarǵa qosylǵan adamdardyń azamattyǵyn shekteý múmkindigi de talqylandy.
D. Nazarbaeva frantsýz parlamentshisin Astanada ótetin «EKSPO-2017» halyqaralyq kórmesine kelýge shaqyrdy jáne shara aıasynda sheteldik kompanııalarǵa arnalǵan aýqymdy múmkindikterdi atap ótti. T. Marıanı óz kezeginde qazaqstandyq áriptesterin 6 naýryzda Parıjde ótetin «Frantsııa aımaqtarynyń Ortalyq Azııa elderimen ekonomıkalyq yntymaqtastyǵynyń keleshegi» konferentsııasyna qatysýǵa shaqyrdy. D. Nazarbaeva bizdiń memleketterimiz arasyndaǵy ekonomıkalyq baılanystarǵa qosymsha serpin beretin ol forýmǵa Senat delegatsııasynyń qatysatynyn aıtty.
