Darıǵa Nazarbaeva: Elimizde tek sý máselesine jaýapty ýákiletti organ qurý kerek
NUR-SULTAN. QazAqparat – Parlament Senatynyń tóraǵasy Darıǵa Nazarbaeva Úkimet respýblıkanyń sý resýrstaryn saqtaý jóninde memlekettik baǵdarlama ázirleýi kerektigin málim etti, dep habarlaıdy QazAqparat tilshisi.
«Úkimet respýblıkanyń sý resýrstaryn saqtaý jóninde memlekettik baǵdarlama ázirleýi kerek dep esepteımin. Oǵan búgingi Senat otyrysynda aıtylǵan usynystar men keńesterdiń, ǵalymdardyń zertteýiniń bári engizilýi tıis. Menińshe, bul baǵdarlamany ázirleýdi jedel qolǵa alý kerek. Sol kezde ǵana biz sý qaýipsizdigi máselesin júıeli túrde sheshe alamyz», - dedi Darıǵa Nazarbaeva.
Senat tóraǵasy eldegi sý máselesine bir emes, birneshe mınıstrliktiń jaýapty bolyp otyrǵanyn atap ótti.
«Sý qaýipsizdigi jónindegi alǵashqy eki tyńdaýda tek sý máselesine jaýapty jeke ýákiletti organ bolýy kerektigi týraly másele kótergen bolatynbyz. Kún tártibinen bul máseleni alyp tastaı almaımyz. Ol organnyń qandaı sıpatta bolatynyn bilmeımin. Bálkim, bul agenttik bolady, bálkim mamandandyrylǵan uıym bolyp qurylady. Biraq, bul tek sý qaýipsizdigine ǵana jaýapty uıym bolýy tıis. Búgin Esep komıteti óz baıandamasynda keltirgendeı, sý máselesin retteýge qanshama shyǵyn ketken», - dedi ol.
Eske sala ketsek, buǵan deıin Parlament Senatynyń Halyqaralyq qatynastar, qorǵanys jáne qaýipsizdik komıtetiniń múshesi Qaırat Qojamjarov álemde 68 memleket sý defıtsıtin bastan keshirip otyrǵanyn, sonyń ishinde Qazaqstan da baryn atap ótken edi.
