Darıǵa Nazarbaeva EQYU tóraǵasymen kezdesti
D.Nazarbaeva Slovakııany EQYU-ǵa tóraǵalyq etýiniń bastalýymen quttyqtap, Qazaqstan kúrdeli halyqaralyq jaǵdaıda júzege asyp jatqan slovak mıssııasynyń basymdyqtaryn qoldaıtynyn atap ótti.
«Sizderdiń tóraǵalyq etýlerińizdegi qaqtyǵystardyń aldyn alý, preventıvti dıplomatııa, mýltılateralızm basymdyqtary Qazaqstan táýelsizdik alǵan kezden bastap ustanatyn syrtqy saıası baǵyttarymen dálme-dál úndesip otyr», - dedi Senat tóraǵasy.
Áńgime barysynda EQYU-nyń bitimgerlik áleýetin nyǵaıtýǵa basa nazar aýdaryldy.
M.Laıchak Uıymnyń qarýly qaqtyǵystar aımaqtaryndaǵy shıelenisti azaıtý jáne kelissóz úderisterin damytýǵa arnaǵan kúsh-jigeri týraly aıtty.
D. Nazarbaeva Aýǵanstandaǵy ahýaldyń óristeýine baılanysty alańdaýshylyq bildirdi jáne EQYU-ǵa osy óńirdi nazardan tys qaldyrmaýǵa shaqyrdy.
M. Laıchak Qazaqstannyń álemdik saıasattaǵy rólin joǵary baǵalady.
«Qazaqstan - Ortalyq Azııadaǵy negizgi memleket, bul el EQYU-nyń basymdyqtaryn jaqsy biledi. Uıymnyń osy júzjyldyqta jalǵyz sammıti dál osy jerde ótti. Sammıtte qabyldanǵan Astana deklaratsııasy qazirgi ýaqytqa deıin mańyzyn joıǵan joq», - dedi EQYU tóraǵasy.
Ol sondaı-aq Sırııadaǵy jaǵdaıdy retteý jónindegi Qazaqstan astanasyndaǵy kelissózderdiń mańyzdy rólin atap ótti.
«Astana kelissózderi sırııalyq retteýlerge zor úles qosty, al Jeneva protsesteri tyǵyryqqa tirelgen bolatyn», - dedi M. Laıchak.
Senat tóraǵasy óz kezeginde Astana deklaratsııasyna qatysýshylardyń birtutas ári ortaq Eýro-Atlantıkalyq jáne Eýrazııalyq qaýipsizdik qoǵamdastyǵyn qalyptastyrý jónindegi ózderine alǵan mindettemelerin iske asyrý maqsatynda birlesken kúsh-jigerdi jalǵastyrý qajet degen pikirin bildirdi.
Onyń pikirinshe, Astana deklaratsııasyn júzege asyrý jónindegi is-qımyl josparyn qabyldaý týraly buryn qol jetken ýaǵdalastyqty iske asyrý qajet.
Júzdesýshiler EQYU parlamenttik ólshemderin nyǵaıtýdyń keleshegin talqylady.
D.Nazarbaevanyń aıtýynsha, qazaqstandyq delegatsııa árdaıym belsendilik tanytyp otyrǵan EQYU Parlamenttik Assambleıasy onyń qatysýshylary arasyndaǵy únqatysýdy nyǵaıtýǵa jáne senimdi qalpyna keltirýge arnalǵan mańyzdy alań bolyp tabylady.
Senat tóraǵasy sondaı-aq ótken jyly Qazaqstannyń Tuńǵysh Prezıdenti-Elbasy N.Á.Nazarbaevtyń 2020 jyly 1975 jylǵy Helsınkıı Qorytyndy aktisiniń 45 jyldyǵyna arnalǵan Qaýipsizdik jáne yntymaqtastyq jónindegi halyqaralyq konferentsııasyn ótkizý, sondaı-aq Eýrazııa keńistiginde keshendi qaýipsizdikti qamtamasyz etý máselelerin talqylaý úshin EQYU, AÓSShK jáne ASEAN Óńirlik forýmy hatshylyqtarynyń birlesken kezdesýin uıymdastyrý týraly bastamalaryna toqtaldy.
D.Nazarbaevanyń pikirinshe, Slovak tóraǵalyǵynyń basymdyqtaryna sáıkes keletin osy bastamalardy iske asyrý EQYU-ny jańa deńgeıge shyǵarýy yqtımal.