Darıǵa Nazarbaeva: Dúrliktirýshiler men arandatýshylar – koronavırýs sııaqty bizdiń dushpanymyz
NUR-SULTAN. QazAqparat - QR Parlamenti Senatynyń Tóraǵasy Darıǵa Nazarbaeva elimizde tótenshe jaǵdaı engizilýine baılanysty qazaqstandyqtarǵa úndeý jasady, dep habarlaıdy QazAqparat tilshisi.
«Elimizdiń Prezıdenti Q.K.Toqaev engizgen tótenshe jaǵdaı - ýaqtyly jáne qajetti shara. Bizdiń ortaq maqsatymyz - koronavırýs ınfektsııasynyń taralýymen kúresý, onyń Qazaqstan ekonomıkasyna jáne adamdardyń ómirine teris yqpal etýiniń aldyn alý. Barlyq memlekettik qyzmetter, ákimdikter azamattardyń qaýipsizdigin qamtamasyz etýge jáne halyqty barlyq qajetti zattarmen úzdiksiz qamtamasyz etý máselesin sheshýge jumyldyrylǵan. Qazirgi ýaqytta medıtsına qyzmetkerlerine barynsha kómek pen qoldaý kórsetý qajet - olar osy aýrýmen kúrestiń aldyńǵy qatarynda, adamdardyń ómiri men densaýlyǵy olardyń kásibıligi men jaýapkershiligine baılanysty», - dep atap ótedi Senat Tóraǵasy.
Onyń atap ótýinshe, quqyq qorǵaý organdarynyń áreketterine jáne tótenshe jaǵdaılar kezindegi azamattardyń tártibi men qaýipsizdigin qamtamasyz etý qajettiligine baılanysty shekteýlerge túsinistikpen qaraýymyz kerek. Memlekettik organdardyń mindeti - pandemııa jáne onymen kúresý boıynsha júrgizilip jatqan sharalar týraly aqparattyń barynsha ashyqtyǵy men senimdiligin qamtamasyz etý.
«Úreıli kóńil kúı, qaýeset pen jalǵan aqparat taratýǵa úzildi-kesildi toqtaý salý kerek. Dúrliktirýshiler men arandatýshylar – koronovırýstyń ózi sııaqty bizdiń dushpanymyz. Pandemııamen kúresýdegi bizdiń ortaq jetistigimiz, birinshi kezekte, búkil qoǵamnyń, elimizdiń barlyq azamattarynyń, bizderdiń, qazaqstandyqtardyń jaýapkershilik ustanymyna baılanysty. Tynyshtyqty, tártipti, gıgıenany saqtaý, oqshaýlaný, ózińizge jáne jaqyn adamdaryńyzǵa qamqorlyq jasaý - vırýspen kúresýdiń basty quraly. Búgin bárimizge yntymaqtastyq jáne ózara jaýapkershilik pen kómek qajet. Ózińizdi jáne jaqyn adamdaryńyzdy kútińizder. Bárimiz birge jeńemiz!», - dedi Darıǵa Nazarbaeva.
