Darıǵa Nazarbaeva Dúnıejúzilik bankpen birlesken yntymaqtastyqty talqylady
NUR-SULTAN. QazAqparat - Parlament Senatynyń Tóraǵasy Darıǵa Nazarbaeva Dúnıejúzilik banktiń Ortalyq Azııa boıynsha aımaqtyq dırektory Lılııa Býrýnchýkti qabyldady. Bul týraly palatanyń baspasóz qyzmetinen málim etti, dep habarlaıdy QazAqparat.
Atalǵan sharaǵa Parlament Senatynyń depýtattary, Dúnıejúzilik banktiń Qazaqstandaǵy turaqty ókili Jan-Fransýa Marto qatysty.
Kezdesý barysynda Qazaqstan men Dúnıejúzilik banktiń arasyndaǵy birlesken yntymaqtastyqty damytý baǵyttary talqylandy.
«Qazir ekonomıkalyq suraqtarǵa erekshe mán berýdemiz. Búginde Senat el ekonomıkasynyń ósimin jedeldetý, adamdar tabysyn arttyrý jáne memlekettik bıýdjettiń kiris bóligin ulǵaıtýdy qamtamasyz etý máselelerine alańdaýly», - dedi D. Nazarbaeva.
Óz kezeginde, Lılııa Býrýnchýk birlesip jumys isteýge daıyn ekendigin aıta kelip, Dúnıejúzilik bank taldaý jáne ákimshilik monıtorıngtik jobalar, bıýdjet tabysynyń kólemin arttyrý jáne qarajatty utymdy qoldaný sharalaryna erekshe nazar aýdaratynyn málim etti.
Sonymen qatar, Dúnıejúzilik banktiń aımaqtyq dırektory Qazaqstanda qabyldanǵan salyqtyq reformalardyń nátıjesi men salyqtyq jeńildikterdiń tıimdiligin zertteýdi usyndy. Odan bólek, L. Býrýnchýk Dúnıejúzilik banki tarapynan agroónerkásiptik keshen salasy, tranzıt áleýeti jáne jasyl ekonomıkany monıtorıngileý múmkindigi týraly aıtty.
Kezdesý nátıjesinde eki jaq ekonomıkalyq protsesti uzaqmerzimdi baqylaý metodologııasy, qoldanystaǵy statıstıkany taldaý jáne baǵdarlamalardy zertteý boıynsha konsýltatsııa almasýdy odan ári jalǵastyrýǵa kelisti.
