Darıǵa Nazarbaeva Dýma depýtattarymen kezdesti
ASTANA. QazAqparat - Parlament Senaty Halyqaralyq qatynstar, qorǵanys jáne qaýipsizdik komıtetiniń tóraǵasy Darıǵa Nazarbaeva Reseı Memlekettik Dýmasy Qorǵanys komıtetiniń tóraǵasy Vladımır Shamanovpen jáne Memlekettik Dýmanyń TMD isteri, eýrazııalyq ıntegratsııa jáne otandastarmen baılanystar komıteti tóraǵasynyń orynbasary Konstantın Zatýlınmen kezdesti, dep habarlaıdy Senattyń baspasóz qyzmeti.
D.Nazarbaeva Qazaqstan men Reseıdiń tatý kórshilik qatynastaryn nyǵaıtýda parlamentaralyq baılanystar negizgi máselelerdiń biri ekenin atap ótti. Senator TMD jáne UQShU Parlamentaralyq Assambleıalary sekildi alańdarda ózara parlamentaralyq is-qımyldy odan ári nyǵaıtý jaıynda aıtty.
V.Shamanov Qazaqstan Prezıdenti N.Nazarbaevtyń Sırııadaǵy shıelenisti retteýge qosqan zor úlesin atap ótti. Astanadaǵy kelissózder aıasynda qol jetken jetistikter onyń mańyzdylyǵyn dáleldegen bolatyn. «Astana halyqaralyq shıelenisterdi sheshýdegi álemdik ortalyqtardyń birine aınaldy», - dep atap ótti ol.
Senator óz kezeginde Sırııadaǵy jaǵdaıdy turaqtandyrýdaǵy, DAISh jáne basqa da terrorshyl toptardyń áskerı jáne qarjylaı áleýetin joıýdaǵy Reseıdiń erekshe rólin atap ótti.
«Qazaqstan budan bylaı da Sırııadaǵy teketiresti beıbit retteýge járdemdesýge, onyń ishinde Astanada sırııaaralyq kelissózderdi júrgizýge barlyq qajetti jaǵdaıdy jasaýǵa ázir», - dedi D.Nazarbaeva. Reseı depýtattary Memlekettik Dýmadaǵy zań shyǵarý qyzmeti, sondaı-aq shekara mańaıyndaǵy yntymaqtastyqty nyǵaıtý jónindegi jumystar barysy týraly D.Nazarbaevany habardar etti.
Kezdesý barysynda halyqaralyq kún tártibiniń basqa da mańyzdy salalary, atap aıtqanda ıadrolyq taqyrypqa qatysty Irandaǵy ózekti máseleler men Aýǵanstandaǵy ahýaldy turaqtandyrý da talqylandy.
