Darıǵa Nazarbaeva «Doha debattary» telebaǵdarlamasynyń basshysymen kezdesti
ALMATY. QazAqparat - Senat tóraǵasy Darıǵa Nazarbaeva Amdjad Atallahpen kezdesti, dep habarlaıdy QazAqparat QR Parlamenti Senatynyń baspasóz qyzmetine silteme jasap.
Senat basshysynyń «Doha debattary» telebaǵdarlamasynyń basqarýshy dırektory Amdjad Atallahpen kezdesýi barysynda ózara is-qımyldyń keleshegi zor jobalary, atap aıtqanda Eýrazııalyq medıa forýmnyń telebaǵdarlamamen yntymaqtastyǵy talqylandy.
Baǵdarlamanyń maqsaty - kópjaqty pikirsaıystar men naqty is-qımyldar arqyly jahandyq problemalardyń birlesken sheshimderin izdestirý. Bul Eýrazııanyń jáne búkil halyqaralyq qoǵamdastyqtyń geosaıası, ekonomıkalyq, áleýmettik-mádenı damýynyń negizgi problemalary boıynsha erkin jáne ashyq pikirlesý qalyptastyrýǵa baǵyttalǵan EAMF mıssııasymen úndes keledi.
Eske sala ketsek, A. Atallah Eýrazııalyq medıa forýmda 23 mamyr kúni «Mass-medıanyń sandyq aqıqaty: biz syn-qaterdi qabyldaımyz ma?» taqyryby boıynsha otyrysta sóz sóıledi.
