Darıǵa Nazarbaeva dinı kóshbasshylardyń ókilderimen kezdesti
Senat Tóraǵasy, Hatshylyq basshysy Darıǵa Nazarbaeva Vatıkan memleketiniń Dinaralyq dıalog jónindegi Papa Keńesi ıslam máseleleri jónindegi bıýrosynyń basshysy, monsenor Haled Akashemen kezdesýde elimizdegi beıbitshilik pen kelisimdi nyǵaıtýdaǵa qazaqstandyq katolıkterdiń úlesin atap ótti.
H.Akasheniń aıtýynsha Kıeli Taq álemdegi konfessııaaralyq jáne dinaralyq kelisimdi udaıy qoldap keledi. Sondyqtan qazirgi kezde Papa keńesi konfessııaaralyq jáne órkenıetaralyq únqatysýdy damytý jónindegi N.Nazarbaev ortalyǵymen yntymaqtastyq memorandýmyn jasaýǵa baılanysty jumystar júrip jatyr.
Papa keńesiniń ókili Haled Akashe sondaı-aq 2001 jyly Rım Papasynyń Qazaqstanǵa kelgenin aıta kelip, bul tarıhı sapardyń ótkenine 20 jyl tolǵanyn atap ótti. Osyǵan oraı 2021 jyly ótetin VII Sezge pontıfıktiń kelýi yqtımal.
Hatshylyq basshysy Izraıldiń ashkenazıılik Bas ravvıniniń ókili, Netanııa ortalyǵynyń ravvıni M.Laý jáne Izraıldiń sefardtyq Bas ravvıniniń ókili, Ierýsalımdegi Ońtústik Amerıka qaýymynyń ravvıni I.Lorıntspen kezdesýde Hatshylyqtyń aldaǵy josparlary týraly sóz etti. Senat Tóraǵasynyń aıtýynsha osy jyldar aralyǵynda Sezd senim jáne ózara túsinistik sharalaryn qalyptastyrýdyń erekshe alańyna aınaldy.
«Osy elde ótkizgen birneshe saǵatta barlyq din jáne ult ókilderine kórsetilgen jyly shyraı men dostyq peıilge kýá boldyq. Siz basqaryp otyrǵan Hatshylyq álemdi tolǵandyryp otyrǵan konfessııaaralyq jáne dinaralyq taqyryptardy talqylaýǵa daıyn ekenin kórsetti. Bul únqatysý alańy qazirgi kezdegi barlyq keleńsizdikterge toıtarys bere alatyn qorǵan bolatynyna úmit artamyz», - dep atap ótti Izraıldiń ashkenazıılik Bas ravvıniniń ókili, Netanııa ortalyǵynyń ravvıni M.Laý.
Qytaı býddashylar qaýymdastyǵy Bas hatshysynyń orynbasary Shı Chýnven jańadan qurylǵan Konfessııaaralyq jáne órkenıetaralyq únqatysýdy damytýdyń N.Nazarbaev ortalyǵynyń jumysyn atap ótip, Qytaı Álemdik jáne dástúrli dinder lıderleri Seziniń joǵary bastamalaryn tolyq qoldaıtynyn jetkizdi.
Senat Tóraǵasy Álemdik jáne dástúrli dinder lıderleri Sezi jumysynyń mańyzyn atap ótti.
«Búgingi kúni Sezd - barlyq dinder, halyqaralyq uıymdar, saıası qaıratkerler men sarapshylardyń basyn qosqan erekshe ókiletti únqatysý alańy. Dinı kóshbasshylardyń kezdesýi jaqsy dástúr bolyp otyr. Alǵashynda jańalyq bolǵany ras. Búgingi kúni barlyǵy da múmkin ekenine kýá boldyq. Bastysy – túzý nıet», - dedi D.Nazarbaeva.
