Darıǵa Nazarbaeva: Depýtattar jýrnalıstermen bir platformada tur
ASTANA. QazAqparat - QR Parlament Senatynyń depýtaty Darıǵa Nazarbaeva «Qazaqstan Táýelsizdigi jáne Elbasy» atty shyǵarmashylyq konkýrstyń jeńimpazdaryn marapattaý rásimine qatysty, dep xabarlaıdy QazAqparat tilshisi.
«Patrıotızmniń san alýan kórinisteri bolady. Biz óz júıemizdi jetildiremiz dep, ony synǵa alsaq, bul - patrıotızmniń kórinisi. Halyqtyń boıyna senim men optımızm uıalatamyz dep, óz jetistikterimizben maqtansaq, ol da - patrıotızmniń bir kórinisi. Men ekeýin de qoldaımyn. Qazaqstan jýrnalıstıkasynyń arqasynda biz ekonomıkada, áleýmettik salada úlken jetistikterge jettik. Negizi, bizder - depýtattar jýrnalıstermen bir platformada turmyz deýge bolady. Biz de synaýdy jaqsy kóremiz. Sebebi jumystaǵy kemshilikter úshin, memlekettik jobalardy iske asyrǵanda týyndaıtyn sátsizdikter úshin alańdaımyz. Bizdiń basqarý júıemiz qysqa ýaqyttyń ishinde jetilse eken dep tileımiz. Men ózim optımıstpin. Sony sizderge de tileımin», - dedi D.Nazarbaeva.
Onyń aıtýynsha, qandaı da bir júıeni synaý - bul qalypty úrdis, damýdyń basty sharty. Al jýrnalıster, úkimettik emes uıymdar men depýtattardyń arqasynda kemshilikter nazardan tys qalmaıdy. «Sondyqtan bárimiz bir maqsatqa jumys istep jatyrmyz», - dep atap kórsetti D.Nazarbaeva.
Aıta keteıik, bıylǵy baıqaýǵa eldiń túkpir-túkpirinen 564 jumys tústi. Konkýrsqa barlyǵy 120-dan astam buqaralyq aqparat quraldarynyń ókilderi qatysty. Olardyń ishinde sheteldik jýrnalıster de bar.
«Sondyqtan komıssııa músheleri baıqaýǵa xalyqaralyq mártebe berýdi biraýyzdan qoldady. Endi, sheteldik jýrnalıster «Sheteldik BAQ-taǵy úzdik jarııalanym» atty xalyqaralyq nomınatsııaǵa qatysa alady», - deıdi QR Parlament Senatynyń depýtaty Darıǵa Nazarbaeva.
