Darıǵa Nazarbaeva tsıfrlyq urpaq týraly: Qazirgi balalar qýyrshaqpen oınamaıdy
ALMATY. QazAqparat - Darıǵa Nazarbaeva XV Eýrazııalyq medıa forýmnyń ashylýynda tsıfrlyq urpaqtyń búgingi kelbeti týraly aıtty, dep habarlaıdy QazAqparat tilshisi.
Forýmdy uıymdastyrý komıtetiniń tóraıymy Darıǵa Nazarbaevanyń aıtýynsha, búgingi BAQ osydan birneshe jyl burynǵyǵa túbegeıli uqsamaıdy.
«Bizdiń aınalamyzdaǵy ózgeristerge kelsek, bul týraly aıtatyn nárse jeterlik. Aqparat quraldary túbegeıli ózgerdi. Eń alǵash ret 2002 jyly Almatyda bas qosqanda iPhone da, Facebook te, Instagram da, WhatsApp ta bolmaǵan. Bul jańa tehnologııalar bizdiń ómirimizge aınaldyrǵan bir-eki jylda enip, ajyramas bóligine aınaldy. Peıdjer degen sóz umytyldy. Telefondardy tek kóne fılmderden kóremiz. Teledıdar jáshigi "suıyq" ekranǵa aınaldy. Smartfon qazir qaltaǵa syıyp ketetin kompıýter», - dedi ol.
Darıǵa Nazarbaeva bul ózgeristerdiń qazirgi urpaq ómirine qalaı yqpal etip jatqanyn aıtty.
«Biz bala kezimizde qýyrshaqpen qalaı oınadyq. Týra solaı qazirgi balalar devaısterden ajyramaıdy. Álemdik medıatutyný ózge keıipke endi. Qazirgi tsıfrlyq urpaq aqparattar álemin kóz ilespes jyldamdyqpen meńgerip keledi. Bul urpaq dástúrli nemese balama aqparat kózderin qatar paıdalanady. Olar ǵalamtor múmkindigin qalyptaǵy jaǵdaı etip qabyldaıdy», - dedi D.Nazarbaeva.
Aıta ketý kerek, Almatyda XV Eýrazııalyq medıa forým óz esigin ashty.
Ortalyq Azııadaǵy táýelsiz dıalog alańy atalǵan Eýrazııa medıa forýmyna 60-tan astam elden 500 deleget qatysýda. Alqaly jıynda sarapshylar men saıasatkerler, ekonomıster men qoǵamdyq pikir ıeleriniń qatysýymen Qazaqstannyń, Eýrazııanyń, jalpy álemdik qaýymdastyqtyń ekonomıkalyq, geosaıası, áleýmettik mádenı máselelerin talqylaý. Forýmnyń alǵashqy kúni sheberlik dáristerinen bastaldy.
