Darıǵa Nazarbaeva: Chehııa - Qazaqstannyń Eýroodaqtaǵy keleshegi zor áriptesteriniń biri

NUR-SULTAN. QazAqparat - Darıǵa Nazarbaeva Qazaqstan men Chehııa arasyndaǵy ózara tıimdi yntymaqtastyqty tereńdetý týraly aıtty, dep habarlaıdy QazAqparat Senattyń baspasóz qyzmetine silteme jasap.

Parlament Senatynyń Tóraǵasy Darıǵa Nazarbaeva Chehııa Respýblıkasy Parlamenti Depýtattar palatasynyń Tóraǵasy Radek Vondrachekpen kezdesý ótkizdi.

Taraptar aýyl sharýashylyǵy, kólik-tranzıt ınfraqurylymy, energetıka, farmatsevtıka, densaýlyq saqtaý jáne týrızmdi óristetý salasyndaǵy birlesken jobalardyń keleshegin talqylady.

Darıǵa Nazarbaeva kezdesýdi asha kelip, Chehııa Qazaqstannyń Eýro Odaqtaǵy keleshegi zor saýda-ınvestıtsııalyq áriptesteriniń biri ekenin jáne osy elmen dostyq qatynasty tereńdetýge basa nazar aýdarylatynyn atap ótti. Senat Basshysy Chehııa kásipkerlerin Qazaqstanmen yntymaqtastyqty keńeıte túsýge shaqyrdy.

«Qazaqstan arqyly Azııa men Eýropa elderin baılanystyratyn 5 temirjol jáne 6 avtokólik baǵdary ótedi. Sol sebepti shekaralas eldermen jobalardy iske asyrýdyń tuǵyry retinde Qazaqstandy qarastyrý múmkindigi bar», - dedi D.Nazarbaeva.

Chehııa Respýblıkasy Parlamenti Depýtattar palatasynyń Tóraǵasy óz kezeginde Qazaqstan men Chehııa arasyndaǵy qatynastardyń joǵary deńgeıde ekenin baǵalady jáne olardy damytýdyń zor áleýetin atap ótti.

Radek Vondrachek sondaı-aq «Nurly jol» ınfraqurylymdyq damýdyń memlekettik baǵdarlamasyn iske asyrýdyń mańyzyn atap ótip, eki el arasyndaǵy yntymaqtastyqtyń osy baǵytyn keńeıtýge múddelilik bildirdi.