Darıǵa Nazarbaeva: Bizdiń ortaq maqsatymyz - azamattardyń ómir sapasyn arttyrý
NUR-SULTAN. QazAqparat - Jergilikti memlekettik basqarý organdarynyń qyzmetin naqty mazmunmen baıytý jáne jergilikti ózin-ózi basqarýdy tolyqqandy jumyspen qamtamasyz etý kerek. Parlament Senatynyń tóraǵasy Darıǵa Nazarbaeva Nur-Sultanda ótken kezdesýde elorda máslıhaty depýtattarynyń aldyna osyndaı mindetter qoıdy, dep habarlaıdy QazAqparat.
«Qoldanystaǵy zańnama jergilikti bılik organdaryna aıtarlyqtaı ókilettik beredi. Bıýdjet qarajatyn jumsaýdyń basymdyqtaryn anyqtaý, qolda bar qarjy resýrstaryn durys bólý, jergilikti bıýdjettiń oryndalýyn baqylaý máslıhat depýtattaryna baılanysty», - dedi Senat spıkeri.
Máslıhat hatshysy Janat Nurpeıisov máslıhattyń kóshpeli komıssııasy turaqty túrde jumys isteıtinin ári jarııa tyńdaýlar qarsańynda nysandarǵa baryp, elorda turǵyndarymen kezdesetinin jáne qalanyń jaı-kúıiniń naqty baǵasyn alatyny týraly habardar etti.
Astanalyq máslıhat depýtaty Ramzııa Ómirbaeva qalanyń áleýmettik salasyn jaqsartý jolynda jasalǵan depýtattyq bastamalar týraly aıtty.
Senat tóraǵasy máslıhattar qyzmetin damytýdyń ózekti máselelerin egjeı-tegjeıli talqylaǵannan keıin úlestik qurylystardyń máseleleri, halyqtyń áleýmettik álsiz toptaryn turǵyn úımen qamtamasyz etý, qalalyq ınfraqurylymdy jaqsartý jáne basqa da jedel sheshýdi talap etetin birqatar ózekti máselelerge sharaǵa qatysýshylardyń nazaryn aýdardy.
«Bizdiń ortaq maqsatymyz - azamattardyń ómir súrý deńgeıi men sapasyn arttyrý. Adamdar jaqsy jańalyqtar men ózgeristerdi kútedi. Jáne erteń emes, búgin kútip otyr», - dedi D. Nazarbaeva.
Senat basshysy mańyzdy memlekettik baǵdarlamalardy halyq arasyna jetkizý men habardar etý jumystarynyń nashar ekenin atap ótti. D.Nazarbaevanyń pikirinshe, bul jergilikti áleýmettik qyzmetterdiń jumysyndaǵy olqylyqtar bolyp tabylady.
Senat spıkeri halyqtyń turǵyn úı máselesin sheshý úshin bıýdjettik turǵyn úı men jataqhana salýǵa kásipkerlerdi tartýdy usyndy. Sondaı-aq aýdıttiń táýelsizdigi men tıimdiligi jáne aımaqtardaǵy tekserý komıssııalarynyń baqylaý mindetterin qamtamasyz etýdiń qajettigi atap ótildi.
«Joǵarǵy palatanyń basshysy máslıhat depýtattaryn zań jobalaryn ázirleýge belsendi qatysýǵa, olardy iske asyrý kezeńinde óz eskertýleri men usynystaryn berýge, al senatorlarǵa - saılaýshylardyń naqty problemalaryn bilý jáne olardy jedel sheshý úshin máslıhat depýtattarymen jıi qarym-qatynas jasaýǵa shaqyrdy», - delingen QR Parlament Senaty baspasóz qyzmetiniń málimetinde.
