Darıǵa Nazarbaeva bilim mınıstrine apatty mektepter problemasyn bir jyldyń ishinde sheshýge keńes berdi
ASTANA. QazAqparat - Búgin Parlament Májilisindegi «Nur Otan» fraktsııasynyń jıyny barysynda palata vıtse-spıkeri Darıǵa Nazarbaeva Bilim jáǵe ǵylym mınıstrine tıimsiz shyǵystardy qysqartyp, bir jyl ishinde apatty jáne úsh aýysymdaǵy mektepter problemasyn sheshýdi usyndy. Eske salaıyq, jıyn barysynda «2015-2017 jyldarǵa arnalǵan respýblıkalyq bıýdjet týraly» zań jobasy talqylanǵan bolatyn.
Jıyn barysynda Májilistegi Qarjy jáne bıýdjet komıtetiniń tóraıymy Gúljan Qaraǵusova apatty jáne úsh aýysymdaǵy mektep máseleleri byltyr sheshilýi tıistigin, alaıda bul uzaqqa sozylyp bara jatqanyn aıtqan bolatyn. Depýtattyń sózine qaraǵanda, jyl saıyn bıýdjetten osy maqsatqa qarajat qarastyrylǵanymen, ol qarajat basqa jaqqa burylyp, nátıjesinde apatty jáne úsh aýysymdaǵy mektepter sany azaıar emes. «Qarajat bólinip jatyr, al mektepter qajetti aýdandarǵa salynyp jatqan joq. Egerde bilim mınıstrligi halyqtyń kóshi-qony, bala týý sany, ındýstrııalandyrý aıasyndaǵy shoǵyrlandyrý sekildi máselelerdi naqty zerdelep, ol boıynsha belgili bir kórsetkishterdi ákelmeıinshe, bul mektep jyry solaı jalǵasa bermek. Ekinshi bir másele - mınıstrlikte bir isti bastaıdy da, ony aıaǵyna jetkizbesten orta jolda qaldyryp ekinshisine aýysyp ketip júr. Apatty mektepter máselesi de solaı», - deıdi G. Qaraǵusova.
Osyǵan oraı, Bilim jáne ǵylym mınıstri Aslan Sárinjipov apatty jáne úsh aýysymdaǵy mektepter problemasy kóptegen oblystar boıynsha aldaǵy úsh jylda, al tutastaı respýblıkada bes jylda óz sheshimin tabatynyn aıtqan edi. Onyń sózine qaraǵanda, aǵymdaǵy jyly Qazaqstanda 150 mektep salynsa, sonyń 70-i respýblıkalyq bıýdjet esebinen qamtylyp otyr. «Apatty mektepter degenimiz ne - sony bilesiz be? Bul ár kún saıyn balanyń ómirine qaýip tónip turatyn mektepterdi bildiredi», - dedi óz kezeginde fraktsııa jetekshisi Darıǵa Nazarbaeva Bilim mınıstrine qarata aıtqan sózinde. Sonymen qatar, depýtat apatty jáne úsh aýysymdaǵy mektepter problemasyn soza bermeı bir jyldyń ishinde sheshýge keńes berdi.
