Darıǵa Nazarbaeva bastaǵan senatorlar ońtústiktegi áskerı qurylymdardy aralady
ShYMKENT. QazAqparat - Qazaqstan Respýblıkasy Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva bastaǵan komıtet músheleri memleket jáne qoǵam qaýipsizdigin qamtamasyz etý máseleleri boıynsha Ońtústik Qazaqstanǵa arnaıy issaparmen keldi.
Komıtet músheleri kúngeıdegi áskerı qurylymdar men bólimderdi aralap kórdi, dep habarlaıdy QazAqparat HAA tilshisi.
Qazaqstan Respýblıkasy Ulttyq ulany «Ońtústik» óńirlik qolbasshylyǵynyń Shymkent qalasyndaǵy 6506 áskerı bóliminde bolǵan senatorlar jaýyngerlik qyzmet pen jeke quramǵa júktelgen quqyq qorǵaý mindetterimen tanysty. Olar bólimdegi áskerı tehnıkanyń, qarý-jaraq pen qorǵaý quraldarynyń jańa úlgileri, sondaı-aq Ulttyq ulan qamtamasyz etilgen kıim úlgilerin kórip shyqty. Sondaı-aq, elimizdegi asa jaýapty jaýyngerlik-barlaý tapsyrmalaryn oryndaýǵa mindettelgen «Búrkit» arnaıy maqsattaǵy jasaǵynyń qyzmeti jáne bólimsheniń tynys-tirshiliginen habardar boldy. Munan soń «Jas búrkit» áskerı-patrıottyq klýbynyń músheleri jaýyngerlerik jattyǵýlar men qorǵanystyń túrli ádis-tásilderinen qoıylymdar kórsetti. Ári depýtattar Іshki áskerdiń 1995 jyly tájik-aýǵan shekarasynda qaza tapqan jaýjúrek 17 jaýyngeriniń eskertkishine taǵzym jasap, gúl shoqtaryn qoıdy. Kezdesý barysynda QR Ulttyq ulany «Ońtústik» óńirlik qolbasshylyǵynyń qolbasshysy, general-maıor Qaırat Aqtanov depýtattarǵa qolda bar áskerı tehnıkalardyń múmkindigi men áskerı qurylymdy odan ári damytýdaǵy keleshekte atqarylatyn isterdi aıtyp ótti. Óz kezeginde, senatorlar óńirdegi qorǵanys júıesin jetildirý men kúsh-qýat organdarynyń áleýetin arttyrý baǵyttaryn talqylap, qajet bolǵan jaǵdaıda senat tarapynan túrli qoldaýlar kórsetetinin atap ótti. 
«Elimizdiń qorǵanys kúshi búginde kez kelgen qaýipti jaǵdaıǵa tótep bere alatyn jaǵdaıda. Al, ońtústiktegi shekaraly aımaq pen bul baǵyt biz úshin mańyzdy sanalady. Sebebi, álemde terrorıstik áreketterden qorǵanys kúsheıtilip jatqan jaǵdaıda biz de saqtyq sharalarymyzdy qolǵa alýymyz qajet. Bul rette ońtústiktegi áskerı qurylymdardyń qorǵanysy men qajetti tehnıkasy kúnnen kúnge jańartylyp otyrǵanyn kórip otyrmyz. Dese de erteń biz bul saladaǵy barlyq keleli máselelerdi ózara talqylaıtyn bolamyz. Qajet bolǵan jaǵdaıda Senatta kóterilip, qoldaý kórsetiledi»,- dedi Qazaqstan Respýblıkasy Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń hatshysy Ikram Adyrbekov.
