Darıǵa Nazarbaeva Atyraýda qaza tapqan polıtseıdiń otbasyna kóńil aıtty
ASTANA. QazAqparat - QR Parlamenti Senatynyń tóraıymy Darıǵa Nazarbaeva Atyraýda sýǵa batyp bara jatqan áıeldi qutqaramyn dep qaza tapqan polıtsııa qyzmetkeriniń otbasyna kóńil aıtyp, jedelhat joldady. Bul týraly palatanyń baspasóz qyzmetinen málim etti, dep habarlaıdy QazAqparat.
«Balalaryńyz, patrýldik polıtsııa qyzmetkeri Shalqar Kóshkinbaıuly Aqymǵalıev basqa adamnyń ómirin qutqaramyn dep óz ómirin qıdy, naǵyz erlik kórsetti. Bul Qazaqstan úshin de orny tolmas aýyr qaıǵy. Mundaı erlik jáne azamattyq - basqalarǵa da, ósip kele jatqan jastarǵa da erekshe úlgi. Naǵyz Batyrdy tárbıelegenderińiz úshin Sizderge bas ıemiz», - delingen Atyraý oblysy, Mahambet aýdany, Bereke aýylynda turatyn Aqymǵalıevter otbasyna joldanǵan jedelhatta.
Eske salaıyq, oqıǵa 21 naýryz kúni boldy. Saǵat 21.52-de «102» pýltine belgisiz adam habarlasyp, ortalyq kópirden bir adamnyń sýǵa sekirgenin habarlaǵan. Atyraý qalalyq polıtsııa basqarmasynyń jeke quramy shuǵyl qulaqtandyrylyp, oqıǵa ornyna birinshi jetken patrýldik polıtsııa serjanty Shalqar Aqymǵalıev oılanbastan muzdaı sýǵa sekirgen. Oǵan kómekke ózimen birge bóreneni alyp sýǵa túsken polıtsııa kishi leıtenanty Rústembek Súndetov umtylǵan.
«Sýǵa batqan adamǵa jetken kezimde Shalqar aǵysqa tótep bere almaı batyp ketti. Áıeldi qutqarý mańyzdy boldy. Onyń ústine áıel «ol men úshin óldi» dep aıqaılap, esti shyǵardy», - deıdi Rústembek Súndetov.
Ajaldan qutqarylǵan Batys Qazaqstan oblysynyń týmasy jedel járdem kóligimen oblystyq aýrýhananyń reanımatsııa bólimshesine jetkizildi. Al Rústembektiń áriptesin óz betinshe izdeýi esh nátıje bermedi. 3 gradýs muzdaı sýda sińiri tartylǵan 30 jastaǵy kishi leıtenant Súndetov jaǵaǵa ózi júzip jetken.
«Saǵat 00.50-de Shalqar Aqymǵalıevtiń múrdesi oqıǵa ornynan tómen jaqtan tabylyp, jaǵaǵa shyǵaryldy. Shalqar Aqymǵalıev kópbalaly otbasynyń jalǵyz asyraýshysy. Boıdaq, 1 sáýirde 25 jasqa tolatyn edi. Otanyna 5 jyl boıy adal qyzmet etip kele jatqan ol sýǵa batqan áıeldi qutqaramyn dep óz ómirin qıdy. Іshki ister organdarynyń basshylyǵy men jeke quramy qaza bolǵan azamattyń otbasy men týǵan-týystaryna qaıǵyryp kóńil aıtady», - degen bolatyn QR ІІM keńesshisi - resmı ókil Nurdildá Oraz.
