Darıǵa Nazarbaeva ár oblysqa arnalǵan parlamenttik tyńdaýlardy ótkizýdi usyndy
ORAL. QazAqparat - Senat tóraǵasy Darıǵa Nazarbaeva Batys Qazaqstan oblysyna jumys sapary barysynda máslıhat depýtattarymen, máslıhat janyndaǵy Qoǵamdyq keńes múshelerimen jáne Kásipker áıelder qaýymdastyǵynyń ókilderimen birqatar kezdesýler ótkizdi, dep habarlaıdy QazAqparat joǵary palatanyń baspasóz qyzmetine silteme jasap.
Máslıhat depýtattary aımaqtyń damýyna qatysty Jaıyq ózenindegi ekologııalyq jaǵdaı, kásipkerlikti damytý, agroónerkásip keshenin qoldaý týraly eń ózekti máselelerdi ortaǵa saldy.
«Múmkin, biz ár oblysqa arnalǵan parlamenttik tyńdaýlar josparlaýymyz kerek shyǵar. Sonda biz jergilikti jerlerdegi adamdardy ne tolǵandyratynyn, sheshilmeı jatqan qandaı júıeli problemalar baryn birden biletin bolamyz. Bul jerde retteýdiń joqtyǵynan nemese onyń jetkiliksizdiginen, bolmasa zańnamalyq bazanyń álsizdiginen sheshilmeıtin máseleler týraly sóz bolyp otyr», - dedi D. Nazarbaeva máslıhat depýtattarymen kezdesýde.
Senat tóraǵasy máslıhat janyndaǵy Qoǵamdyq keńes múshelerimen kezdesýde qazirgi kezde elimizde 4 myńǵa tarta adam jumys isteıtin 200-den astam keńes qurylǵanyn eske saldy. Sondaı-aq, «qoǵamdyq keńesterdiń mindeti – qabyldanatyn sheshimderge turaqty saraptama jasaýdyń esebinen atqarýshy jáne zań shyǵarýshy bıliktiń óńirlik organdary jumysynyń sapasyn arttyrý, memlekettik bılik organdarynyń aldyna aımaq halqyn barynsha alańdatatyn ózekti máselelerdi qoıa bilý» ekendigin atap ótti.
D.Nazarbaeva Kásipker áıelder qaýymdastyǵynyń ókilderimen kezdesý kezinde memlekettik basqarý men elimizdiń saıası ómirine áıelderdiń qatysýyn keńeıtýge nazar aýdardy. Onyń pikirinshe, Qazaqstan halqynyń 50 paıyzynan astamyn áıelder quraıtyndyǵyna qaramastan, olar memlekettik qurylymdarda az. «Memlekettik organdar nemese kompanııalardyń basshylarymen qosa, kóptegen jumys berýshiler basshylyq laýazymǵa áıelderge qaraǵanda er adamdy kóbirek alatyny qupııa emes. Bul jaǵdaıdy respýblıkalyq ta, aımaqtyq deńgeıde de ózgertý kerek», - dedi D.Nazarbaeva.
