Darıǵa Nazarbaeva: Agrarlyq saladaǵy baǵdarlamaǵa kedergilerdi anyqtaý kerek
NUR-SULTAN. QazAqparat – Agroónerkásiptik keshen salasyndaǵy memlekettik baǵdarlamalardyń sátti ári nátıjeli júzege asyrylýyna kedergi bolyp turǵan jaǵdaılardy anyqtaý kerek. Bul týraly QR Parlamenti Senatynyń Tóraǵasy Darıǵa Nazarbaeva málim etti, dep habarlaıdy QazAqparat tilshisi.
«2010 jyldan bastap Qazaqstanda 3 memlekettik baǵdarlama qabyldandy. Agroónerkásiptik keshendi damytýdyń qoldanystaǵy úshinshi memlekettik baǵdarlamasy 2021 jyly aıaqtalady. 2017-2021 jyldar aralyǵynda aýyl sharýashylyǵynyń jalpy ónimin 2 esege arttyrý josparlanýda. Statıstıka komıtetiniń málimetteri boıynsha 2017 jyldan bastap 2019 jylǵa deıingi aýyl sharýashylyǵynyń jalpy ónimi 4,5 trln teńgeden aspaǵan. Al 2021 jylǵa qaraı salany damytý baǵdarlamasy aıasynda ol 8,2 trıllıonǵa deıin ósýi kerek. Baǵdarlamany júzege asyrýdyń 3 jylynda 2 trıllıon teńgege jýyq qarajat tek agroónerkásip keshenin sýbsıdııalaýǵa jumsalǵan», - dedi D. Nazarbaeva Senatta agroónerkásiptik keshendi damytý týraly parlamenttik tyńdaýda.
Senat spıkeriniń paıymynsha, salany damytý baǵytynda ǵalymdar men agroónerkásiptik keshen men memlekettik qurylymdardyń ókilderi, ǵalymdar men sarapshylar keń aýqymdy dıalog júrgizýi kerek.
«Memleket bul salany belsendi damytýǵa alǵysharttar jasap, jaǵdaıdy jaqsartý úshin únemi sharalar qabyldap júr dep bilemiz. Aýyl turǵyndary júzege asyrylyp jatqan memlekettik baǵdarlamalardan eń kóp jeńildikter men járdemaqy alýshylar qatarynda dep esepteımiz. Biraq is júzinde baǵdarlamalar aýyl turǵyndarynyń ál-aýqatyn jaqsartyp jatyr ma? Bizge memlekettik baǵdarlamalardyń sátti ári nátıjeli júzege asyrylýyna ne kedergi ekenin túsiný kerek? Búgin osy jáne basqa da kóptegen máseleler talqylanady. Sondyqtan biz agroónerkásiptik keshen men memlekettik qurylymdardyń ókilderin, ǵalymdar men sarapshylardy, jergilikti ózin-ózi basqarý depýtattaryn jáne aýyldar men aýyldardyń turǵyndaryn elimizdegi aýyl sharýashylyǵyn damytý jónindegi keń aýqymdy dıalogqa shaqyramyz. Búgingi kúni eshkimde daıyn formýla joq. Bizdiń mindetimiz - jan-jaqty ashyq jáne ádil talqylaý arqyly jaǵdaıdy jan-jaqty kórý jáne baǵalaý», - dedi Darıǵa Nazarbaeva.
