Dári-dármektiń mólsheri azaımaıtyn 2 aılyq qory jasalýda – Alekseı Tsoı

NUR-SULTAN. QazAqparat – Densaýlyq saqtaý mınıstri Alekseı Tsoı Qazaqstanda dári-dármektiń mólsheri azaımaıtyn eki aılyq qory jınalatynyn málim etti, dep habarlaıdy QazAqparat tilshisi.

«Prezıdenttiń tapsyrmasy boıynsha halyqty dári-dármekpen qamtamasyz etý baǵytynda birqatar shuǵyl shara qabyldandy. Birinshiden pandemııa bastalǵaly beri óńirler quny 14 mlrd teńgege dári-dármektiń 91 túrine ótinim jiberdi. 2020 jyldyń 22 shildesinde búkil eldegi ınfektsııalyq jáne provızorlyq statsıonarlardaǵy dári-dármek qory jasaqtaldy. Biryńǵaı dıstrıbıýtor 11,4 mlrd teńgege dári-dármektiń 91 túrin tıep qoıa berdi», - dedi Alekseı Tsoı Úkimet otyrysynda.

Mınıstrdiń sózinshe elde dári-dármektiń mólsheri azaımaıtyn eki aılyq qoryn qalyptastyrý jumystary júrgizildi.

«Biryńǵaı dıstrıbıýtor qazirgi ýaqytta suranysqa ıe, dári-dármektiń quny 8,2 mlrd teńgelik 44 túrin satyp alyp jatyr. Bul mólsher statsıonarlardaǵy 60 myń naýqasty emdeýge jetedi. Bul baǵyttaǵy shara dári-dármek rezervin qalyptastyrýǵa múmkindik beredi. Sonymen qatar ambýlatorııalyq deńgeıdegi dári-dármektiń tizimi keńeıtildi», - dedi ol.