Dári-dármektiń baǵasy shekti mejeden qymbat bolǵan jaǵdaıda onlaın shaǵymdanýǵa bolady
DariKZ mobıldi qosymshasynyń jańa nusqasynda dárihanalarda dári-dármekter baǵasy ruqsat etilgen shekti mejeden asyra qoıylǵan jaǵdaılarǵa shaǵymdar túsirý qyzmeti iske qosyldy jáne jańartyldy.
Dári baǵasynyń asyra qoıylýy jóninde málimdeýge yńǵaıly bolýy úshin ázirleýshiler komandasy «Shaǵym» nysanyna keri baılanys maqsatynda engizilgen mobıldi telefon nómiriniń durystyǵyn tekserý, aımaq pen shekti baǵany (birdeı baǵa qoıylǵanda) avtomatty toltyrý tetigi qosylǵan. Budan bólek, paıdalanýshy sátti jiberilim jóninde aqparattyq málimdeme alady. Jalpy, dárihanadaǵy baǵaǵa shaǵym túsirý úshin birneshe qarapaıym qadam jasaý qajet:
1. DariKZ mobıldi qosymshasynan shekti baǵasy belgilengen qajetti preparatty tabý;
2. «Baǵaǵa shaǵym túsirý» tetigin basý, qajetti jolaqtardy toltyrý jáne habarlama joldaý.
Sondaı-aq, DariKZ qosymshasynyń kómegimen uqsas preparattarǵa qoıylatyn baǵalardy salystyrýǵa, dáriniń retsept arqyly ne retseptisiz beriletinin jáne sáıkestik sertıfıkatyn tekserýge, sondaı-aq dáriniń óndirýshisi, medıtsınalyq qoldanylýy, saqtaý merzimi týraly jáne t.b. derekterdi bilýge bolady.
Sonymen qatar, DariKZ mobıldi qosymshasynyń jańartylǵan nusqasy dárilik zattardyń jaǵymsyz reaktsııalary jóninde derbes málimdeýge múmkindik beredi.
Dárilik zattyń jaǵymsyz áseri baıandalatyn karta-habarlamalar nemese «sary kartalar» dep atalatyn aqparat paraqtaryn jiberý úshin «Janama áseri» bólimin ashý, habarlamany jóneltýshi, patsıent pen preparat týraly málimetterdi toltyrý, sondaı-aq keri baılanys jáne qajet bolǵan jaǵdaıda aqparatty naqtylaý úshin baılanys derekterin kórsetý, odan keıin «Jiberý» tetigin basý qajet.
DZSUO Farmakologııalyq qadaǵalaý departamentiniń basshysy, m.ǵ.k. Málik Ábdirahmanovtyń aıtýy boıynsha, mobıldi qosymshadaǵy jańa qyzmet dárilik preparattardyń qaýipsizdigin baqylaý júıesi úshin jáne farmakologııalyq naryq aınalymyna qatysýshylarmen, onyń ishinde aqparattyń bastapqy derekkózi retinde turǵylyqty halyqpen ózara baılanysýǵa arnalǵan tıimdi qural qyzmetin atqarady.
