Dári-dármektiń 77% tek retsept boıynsha beriledi
NUR-SULTAN. QazAqparat - Bıylǵy jyldyń 8-jeltoqsanyndaǵy derekke súıensek, Qazaqstanda dárilik zattardyń 7,4 myńnan astam ataýy tirkelgen. Onyń 77% tek qana retsept arqyly beriledi.
Bul týraly QazAqparat Dárilik zattar men medıtsınalyq buıymdardy saraptaý ulttyq ortalyǵynyń málimetterine silteme jasap habarlaıdy.
Habarlamadan málim bolǵanyndaı, dári-dármekti retsept arqyly berý erejesi Densaýlyq saqtaý mınıstriniń arnaıy buıryǵy negizinde retteledi («Dárilik zattardy retseptimen bosatýǵa jatqyzý erejesin bekitý týraly» buıryq).
Dárilik zattyń retseptýralyq preparatqa jatatyn-jatpaıtyny farmatsevtıkalyq jáne farmakologııalyq qasıetterin saraptaý, mólsherleý, paıdalaný tásilderi, qaýipsizdigi men tıimdiligine qatysty reaktsııalardy anyqtaý barysynda naqtylanady.
Qatań túrde dárigerdiń retseptisi boıynsha beriletin dári-dármekterge mıkrobqa qarsy, gormondyq preparattar, quramynda esirtki jáne psıhotroptyq zattary bar dáriler, adam densaýlyǵyna qaýip tóndiretin jáne qabyldaý rejımi men qoldaný tásilin saqtamaý saldarynan jaǵymsyz reaktsııalar týǵyzýy múmkin preparattar, sondaı-aq ınektsııa men ıngalıatsııa jasaýǵa arnalǵan dárilik preparattar jatady. Sonymen qatar, tek qana aýrýhana jaǵdaıynda qoldanylatyn dári-dármekter bar. Sebebi olardy tek dárigerdiń turaqty baqylaýy negizinde ǵana qoldanýǵa ruqsat etilgen.
Dárýmender, shópten jasalǵan shaılar men jıyntyqtardy alý úshin retseptiniń qajeti joq.
Retseptini emhana dárigeri jazyp beredi. Buryn ony tek qaǵaz túrinde beretin bolsa, qazir elektrondy formattaǵy retseptiler de paıda boldy. Alǵashqysyna dárigerdiń qoly men móri basylýy tıis bolsa, elektrondyq retsept dárigerdiń tsıfrlyq qoltańbasymen rastalýy qajet.
Qazaqstanda tirkelmegen jáne qoldanýǵa ruqsat etilmegen dárilik zattarǵa retsept jazylmaıdy.
«Sońǵy kezde el arasynda dárini dárigerdiń taǵaıyndaýsyz satyp alyp, óz-ózin emdeý beleń alyp keledi. Dári-dármekti jónsiz paıdalaný saldarynan keshegi COVID-19 indetiniń alǵashqy tolqyny kezinde antıbıotıkterge, vırýsqa qarsy jáne qyzý túsiretin preparattarǵa degen suranys kúrt artty. Mundaı preparattardy baqylaýsyz jáne dáriger keńesinsiz paıdalaný adam densaýlyǵyna zııan. Mysaly, bizde kóptegen adamdar azdap sýyq tıip, tumaýrata qalsa birden antıbıotık ishedi. Ókinishke qaraı, qandaı vırýs juqtyrǵanyn anyqtaý úshin bakterııaǵa analız tapsyryp, dáriger keńesine júginetinder kemde kem. Al, vırýsty antıbıotıkpen emdeýge bolmaıdy», - deıdi Dárilik zattar men medıtsınalyq buıymdardy saraptaý ulttyq ortalyǵy bas dırektorynyń orynbasary Baıan Moldahmetova.
Eskeretin jaıt, nusqaýlyq boıynsha qabyldanǵan dári-dármekten keıin jaǵymsyz áseri baıqalsa nemese aýrýdy emdeýge kómektespese emdeýshi dárigerge habarlasyp Ulttyq ortalyqtyń www.ndda.kz resmı saıtyndaǵy sary kartany toltyrý qajet. Habarlama kartasy Ulttyq ortalyqta muqııat taldanyp, saraptama nátıjesi negizinde retteýshi organ tıisti sheshim qabyldaıdy: dári-dármek serııasy toqtatylady nemese onyń tirkeý týraly kýáligi kúshin joıady. Qazaqstanda mundaı habarlamalar kóbine antıbıotıkterge qatysty túsedi.
Sonymen qatar, Qazaqstanda dári-dármek izdeýge arnalǵan DariKZ mobıldi qosymshasy ázirlendi. Ol retseptýralyq jáne retseptisiz beriletin preparattar tizimimen tanysýǵa múmkindik beredi. Qosymshany Google Play jáne AppStore platformalary arqyly júktep alýǵa bolady. Búgingi tańda DariKZ qosymshasyn paıdalanýshylar sany 136 myńǵa jýyqtady.
