Dári-dármekti tek dárigerdiń ruqsatymen ishý kerek - farmakolog
ALMATY. QazAqparat - Dári-dármekti saraptaý ulttyq ortalyǵynyń klınıkalyq bas farmakology, medıtsına ǵylymdarynyń doktory Raısa Kúzdenbaeva retseptisiz satylatyn dárilerdiń qaýpin aıtty, dep habarlaıdy QazAqparat tilshisi.
Almaty qalalyq taýarlar men qyzmetterdiń sapasy jáne qaýipsizdigin baqylaý departamenti, dári dármekti saraptaý ortalyǵy men farmatsevtıka mamandary retseptisiz satylatyn preparattar jóninde másele kóterdi.
«Biz retsept tiziminde turǵan preparattardyń taǵaıyndalýyn sóz etip otyrmyz. Biz dári-dármekti utymdy ári durys paıdalanýymyz kerek. DSU-nyń ruqsaty bar preparattardy naýqas adamdar klınıkalyq qajettilikterine sáıkes qabyldaǵan kezde ǵana qoldaný qajet. Biz durys dıagnoz qoıyp, durys em júrgizýimiz jáne naýqasqa ishetin dáriniń mólsherin anyqtap berýimiz kerek. Búgingi kúni eń tómengi ekonomıkalyq shyǵyndar da óte mańyzdy. Sebebi, bizde tegin emdeletin naýqastardyń kontıngenti bar. Munyń bári baǵalanýy kerek», - dedi klınıkalyq farmakolog Raısa Kúzdenbaeva.
Onyń aıtýynsha, qazir elimizde arnaıy tirkelgen 8 myńnan astam dári-dármek bar.
«Bizde ózin-ózi emdeıtinder kóp. Dárigerdiń keńesine júginbeı-aq, ózderi dıagnoz qoıyp, dárilerdi ózderi tańdap alady. Sebebi, dárihanalarda dáriler retseptisiz satyla beredi. Qazir antıbıotıkter dáýiri júrip tur. Bul - úlken másele. Biz antıbıotıkterge qarsy turdyq. Desek te, áý basta qatelikter ketti. Biz dozany saqtamadyq, jas erekshelikterine nazar aýdarmadyq, durys emes preparattardy tańdadyq», - dep atap ótti baıandamashy.
Avtor: Alma Muqanova
