Dári-dármekti retseptisiz qabyldaýdyń qaýpi qandaı
NUR-SULTAN. QazAqparat - Dári-dármekti retseptisiz, baqylaýsyz qabyldaýdyń qaýpi qandaı? Bul suraqqa Úkimettiń baspasóz ortalyǵynda QR Densaýlyq saqtaý mınıstrligi taýarlar men qyzmetterdiń sapasyn jáne qaýipsizdigin baqylaý komıteti tóraıymy Lıýdmıla Bıýrabekova jaýap berdi, dep habarlaıdy QazAqparat tilshisi.
«Shyntýaıtynda, dári-dármekti retseptisiz qabyldaý - óte qaýipti. Barlyǵyńyz mektepte hımııa pánin oqydyńyzdar. Dári-dármek degenimiz - mine, osy hımııalyq quram. Osy preparattar aǵzamyzǵa enip, denemizdegi múshelermen, tindermen, suıyqtyqtarmen hımııalyq baılanysqa túsedi. Olar aqyry búırek pen baýyr arqyly shyǵady. Sol sebepti, dári-dármekti qabyldaý eń birinshi kezekte dárigerlerdiń baqylaýynda bolýy kerek. Sonda ǵana janama reaktsııany anyqtap, preparattardy aýystyrý nemese onyń mólsherin azaıtý sharalary qabyldanady», - dedi ol.
Eske sala ketsek, buǵan deıin komıtet basshysy shildeden bastap Densaýlyq saqtaý mınıstrliginiń dári-dármek pen medıtsınalyq preparattardyń baǵasyn retteý jónindegi buıryǵy kúshine enetinin málim etken bolatyn. Lıýdmıla Bıýrabekova atap ótkendeı, belgili bir ataýly dáriniń baǵasy barlyq jerde birdeı bolady. Baǵa erejelerin buzǵany úshin 70-1000 AEK deıin ákimshilik aıyppul salynady. Qaıtalanǵan zańbuzýshylyq tirkelse, farmatsevtıkalyq jumysty toqtatýǵa deıingi shara qabyldanady.
Sondaı-aq, retseptilerdi jazyp berý men dárihanalardan preparattardy alý jolyn jeńildetý maqsatynda Densaýlyq saqtaý mınıstrligi 2020 jyldan bastap barlyq óńirge «Qaǵazsyz aýrýhana» júıesin engizbek.
