Dári-dármekterdiń bir bóligi tek dárigerdiń usynysymen ǵana satylatyn bolady
ASTANA. QazAqparat - Elordada QR Densaýlyq saqtaý jáne áleýmettik damý mınıstrligi men elorda ákimdigi, sondaı-aq «Astana densaýlyqty tańdaıdy» farmatsevtıkalyq qaýymdastyǵy birlesken jobany iske qosty, dep habarlaıdy ákimdiktiń resmı saıty. Joba aıasynda dárihanalar dárigerlerdiń usynysy bolmasa, qoldaný uzaqtyǵyn, mólsherleýdi bilýdi qajet etetin preparattardy satpaıdy.
«Jobanyń maqsaty - dárilik zattardy ratsıonaldy paıdalaný. Ókinishke oraı, búginde kóptegen preparattar erkin túrde satylady, bul halyqqa belgili bir qaýip tóndiredi. Kún saıyn álemde júzdegen dári-dármek jasalady, olardy durys paıdalanǵan jaǵdaıda, aýrýdy jeńýge bolady, al kerisinshe jaǵdaıda densaýlyqqa aýyr zardap keltiredi», - dedi QR Densaýlyq saqtaý jáne áleýmettik damý mınıstrligi Medıtsınalyq jáne farmatsevtıkalyq qyzmetti baqylaý komıtetiniń Astana qalasy boıynsha departamentiniń basshysy Roza Qýanyshbekova.
Onyń aıtýynsha, retseptisiz dári-dármekterdi satyp alý úshin burynǵydaı dárigerdiń usynysy qajet bolmaıdy. Oǵan aýrýlardyń jeńil túrin emdeýge arnalǵan preparattar jatady. Al mólsherleý men qoldaný uzaqtyǵyn bilýdi qajet etetin dári-dármekter astanalyqtarǵa dárigerdiń taǵaıyndaýynsyz satylmaıtyn bolady.
Búgingi tańda halyqtyń basym bóligi dárilerdi tanystarynyń, áriptesteriniń, týǵan-týystarynyń usynysymen alady jáne saýalnamaǵa sáıkes elorda turǵyndarynyń 18-20% ǵana dárigerdiń keńesine qulaq asady.
Astana qalasynyń farmatsevtıkalyq qaýymdastyǵynyń prezıdenti Stepan Berezınniń atap ótýinshe, joba kezeń-kezeńmen engiziletin bolady. Birinshi qadam jasaldy - qalanyń barlyq dárihanalary men emhanalarynda óz betinshe emdelýden bas tartýǵa shaqyratyn arnaıy plakattar ilinedi. Sonymen qatar, medıtsına qyzmetkerleri úshin semınarlar uıymdastyrylyp, halyq arasynda keń aýqymdy túsindirý jumystary júrgiziledi.
Aıta keteıik, atalǵan júıe bıyl qyrkúıek-qazan aılarynda tolyǵymen iske qosylady, onyń ústine, joba tek elordada ǵana emes, barsha Qazaqstan boıynsha qolǵa alynbaq.
