Dári-dármekter baǵasy qymbattamaıdy
Sonyń biri - halyqtyń áleýmettik ahýaly tómen toptary úshin eń mańyzdy máseleniń biri - dári-dármekter baǵasy. Osyǵan oraı, elimizde halyq kóp tutynatyn dárilik zattar men medıtsınalyq buıymdardyń baǵasy kóterilgeni týraly derek joq, dep habarlady Densaýlyq saqtaý jáne áleýmettik damý mınıstrligi.
Quzyrly vedomstvo osyǵan oraı: «Aǵymdaǵy jyldyń 23 tamyzynda Densaýlyq saqtaý jáne áleýmettik damý mınıstrliginiń medıtsınalyq jáne farmatsevtıkalyq baqylaý komıtetiniń aımaqtyq departamentteriniń mamandary ótkizgen 200 dárilik zattar men medıtsınalyq buıymdardyń baǵasyna jasalǵan monıtorıng kórsetkendeı, olardyń baǵasynyń óskeni týraly derekter elimizde tirkelgen joq. Osy máselege oraı, turǵyndardan da aryz nemese ótinishter túsken joq» dep habarlady. Atalǵan mınıstrlik ókilderi atap aıtqandaı, Qazaqstannyń barlyq aımaqtarynda mınıstrlik pen respýblıka farmakologııalyq qaýymdastyǵy arasynda qol qoıylǵan dárilik zattar men medıtsınalyq buıymdar baǵasyn ustap turý týraly memorandýmnyń sharttary saqtalýda.
Atap aıtarlyǵy, eń aldymen, dári-dármek satýmen aınalysatyn kásipkerlerge dárilik zattardyń baǵasyn ózgertýge bolmaıtyny eskertilgen. Sál sheginis jasaıtyn bolsaq, aǵymdaǵy jyldyń 30 naýryzynda Densaýlyq saqtaý jáne áleýmettik damý mınıstrligi elimizdegi farmakologııalyq qaýymdastyqpen medıtsınalyq maqsatta paıdalanylatyn dárilik zattar men medıtsınalyq buıymdardyń baǵasyn bir deńgeıde ustap turý týraly kelisim jasaǵan. Túptep kelgende, mundaı memorandým halyqtyń arasyndaǵy áleýmettik ahýaly tómen toptarǵa úlken qoldaý bolǵany sózsiz.
Bir qýanarlyǵy, otandyq jáne halyqaralyq dári-dármek óndirýshiler, elimizdegi dıstrıbıýtorlar men jeke saýda ókilderi dárilik zattar men medıtsınalyq buıymdar baǵasyn 2015 jyldyń 1 naýryzyndaǵy deńgeıden ózgertpeýge mindetteme aldy. Bul 200 dári-dármektiń ishinde halyqqa asa qajettileri, atap aıtqanda, naýqas adamnyń qyzýyn túsiretin, qabynýǵa qarsy jáne aýyrýdy basatyn preparattar, antıbıotıkterdiń keıbir túrleri, sondaı-aq, pispe men jara tańǵyshtar bar.
Bul oraıda, der kezinde shara qoldaný - Qazaqsstan Úkimetiniń daǵdarysqa qarsy saıasatynyń tabysynyń kepili. Sodan shyǵar, bizdiń bul tájirıbemizdi kórshiles elder engizip jatqany. Máselen, 2008-2009 jyldary jahandyq ekonomıkalyq daǵdarysqa qarsy is-sharalarymyzdy birinshi bolyp, reseılikter úlgi tutty. Sol kezde Reseı prezıdenti qyzmetin atqarǵan Dmıtrıı Medvedev: «Dári-dármek baǵasyn qymbattatý arqyly qıyn kezeńde baıyp ketýge umtylý - arsyzdyń isi. Buǵan qasqasha baǵa berýge bolmaıdy» dep málimdegeni esimizde. Olaı bolsa, kimde-kim ekonomıkalyq qıynshylyqtardan aldyn-ala saqtanatyn bolsa, eshqashan utylmaıdy. Bul - buǵan deıingi daǵdarystardan birinshi bolyp shyqqan Qazaqstannyń ozyq tájirıbesi.
Ámirlan Álimjan