Dári-dármekpen qamtamasyz etý boıynsha jasalatyn memlekettik satyp alý jarııaly, ashyq túrde ótýi tıis

Búgin Astanada ótken dóńgelek ústel jıynynda Soros-Qazaqstan qorynyń Basqarma tóraıymy Anna Aleksandrova osylaı málimdedi.

«Dári-dármekpen qamtamasyz etý qazirgi tańnyń eń ózekti máseleleriniń biri. Dári-dármekpen qamtamasyz etýdiń jarııaly túrde júrgizilýi men baqylaýdyń durys uıymdastyrylýy kóptegen adamdardyń ómirin saqtap qalýǵa septigin tıgizedi. Ekonomıkalyq-áleýmettik quqyqtar jónindegi Halyqaralyq paktide, QR Konstıtýtsııasynda bekitilgen ár azamattyń densaýlyq saqtaý quqyǵy qajetti jaǵdaıda dári-dármekke qol jetkizý múmkindigine kepildik beredi. Densaýlyq saqtaý mınıstrligi janynan qurylǵan Keńes osy baǵytta jumys jasap jatyr», - dedi A. Aleksandrova.

Shara barysynda emdelýshilerdiń quqyǵyn qorǵaý salasynda jumys jasaıtyn qoǵamdyq uıymdar Qazaqstan Respýblıkasyndaǵy dári-dármekpen qamtamasyz etý jáne olarǵa baǵa belgileý mehanızmderiniń jarııalylyǵy men ashyqtyǵyna táýelsiz saraptamalyq baǵa berdi. Dári-dármekterdi satyp alý úrdisiniń halyqaralyq standarttarǵa sáıkestigin anyqtaý maqsatynda respýblıkanyń tórt qalasynda, atap aıtqanda Almaty, Qyzylorda, Qaraǵandy jáne Semeı qalalarynyń 79 medıtsınalyq mekemelerinde júrgizilgen saýalnama qorytyndylaryna taldaý jasaldy.

Dóńgelek ústelge Soros-Qazaqstan qorynyń, Azamattyq alıans jáne «Aman-saýlyq» qoǵamdyq qorynyń ókilderi qatysty.