Dári-dármek jáne telefon jetkizýshi retinde tanystyrǵan alaıaq 13 semeılikti aldap ketti
SEMEI. QazAqparat – Semeıde ózin dári-dármek jáne telefon jetkizýshi retinde tanystyrǵan alaıaq 13 adamdy aldap soqqan, dep habarlaıdy QazAqparat tilshisi.
Semeı qalalyq №2 sottyń baspasóz qyzmeti taratqan málimetke súıensek, 2018 jyldyń kókteminen bastap sottalýshy uıaly telefon men jabdyqtaryn satýmen aınalysa bastaǵan. Kásibin ary qaraı damytyp, aınalymdy arttyrý úshin oǵan alǵashqy kapıtal qajet boldy. Sol úshin er adam týystarynan, dostarynan 200-300 myń teńge kóleminde qaryz alyp, taýarlardy satqannan keıin aqshany paıyzdyq ústememen qaıtaryp otyrǵan.
«2018 jyldyń mamyr-jeltoqsan aılary aralyǵynda aıyptalýshy óziniń jaqyndarynan alǵan qaryz somasyn artyǵymen qaıtarǵanda olardyń aqsha aınalymyna qyzyǵýshylyq tanytqanyn baıqady. Osylaısha 25 jastaǵy jigitke jymysqy oı kelgen. Naqty aıtqanda, qylmystyq áreketiniń búge-shúgesin josparlap alǵan ol jurtshylyqqa uıaly telefondardy satyp alý jáne satýmen aınalysatyndyǵyn, onyń aınalymyna aqsha quıýǵa bolatyndyǵyn, sol ınvestıtsııa arqyly 10-nan 110 paıyzǵa deıin paıda tabýǵa múmkindik bar ekendigin jetkizedi. Keıinnen er adam dárihanalar men aýrýhanalarǵa dári-dármek jetkizýmen aınalysatyndyǵyn aıtqan», - delingen habarlamada.
Bul sózge sengen jábirlenýshiler oǵan aqshasyn bere salǵan. Al sottalýshy bolsa áýel basta bireýden alǵan qarajatty ekinshige paıyz retinde qaıtaryp otyrady.
«Tabys tapqan turǵyndar osy jaıly týystaryna, dostaryna, áriptesteri men tanystaryna aıta bastaıdy. Sóıtip, alaıaqtyń «klıentteri» kóbeıe túsken. Keıinnen aqshalary qaıtpaǵan azamattar aldanyp qalǵandaryn túsindi. Materıaldyq shyǵynǵa ushyraǵan 13 jábirlenýshi sotqa aryzdanǵan», - delingen málimette.
Sot úkimi boıynsha aıyptalýshy 6 jyl 8 aı merzimge bas bostandyǵynan aıyryldy. Er adam óz jazasyn qaýipsizdigi ortasha túzetý mekemesinde ótemek. Sot úkimi tolyqtaı zańdy kúshine engen.
