Dári-dármek týraly aqparat árbir adamǵa SMS arqyly keledi - Eljan Birtanov

ASTANA. QazAqparat - QR Densaýlyq saqtaý mınıstri Eljan Birtanov tsıfrlyq texnologııalar arqyly memleket qarjysyn qalaısha únemdep otyrǵanyn aıtyp berdi, dep xabarlaıdy QazAqparat tilshisi.

Mınıstrdiń sózine qaraǵanda, búginde tegin dári-dármekti alatyn adamǵa SMS arqyly xabar berý júıesi bar. Kelesi jyldan bastap barlyq uıaly telefondar tirkeýden ótkennen keıin ondaı xabarlamalar barlyq azamattarǵa túsetin bolady.

«Bárińiz bilesizder, kelesi jyldan bastap barlyq uıaly telefon nómirleri adamnyń jeke sáıkestendirý nómirimen sáıkes bolýy kerek. Sol kezde biz tegin medıtsınalyq kómek alatyn azamattardyń bárine SMS jiberýge tyrysamyz. Birinshiden, ol - dári-dármek. Ekinshiden, túrli profılaktıkalyq qyzmetter bar. Máselen, kóp adamdar skrınıngten ótedi. Áıtpese, búginde kóp jaǵdaıda (emxanalar - avt.) «skrınıngten 94-95 protsentke ótkizip jatyrmyz» dep jazyp beredi. Biraq onyń barlyǵyna aqsha bólinip jatyr ǵoı. Sonyń bárin biz azamattarmen onlaın rejımde jumys isteý arqyly tekseretin bolamyz. Qazir memleket tarapynan kóp aqsha bólinedi. Sol aqsha xalyqqa 100 protsent jetýi kerek. Osyǵan baılanysty aqparattyq texnologııalardy keńinen qoldanamyz», - dedi E.Birtanov jýrnalısterge bergen suxbatynda. 

Onyń aıtýynsha, buryn tegin dári-dármekke qyrýar qarjy bólindi. Biraq jergilikti organdar tapsyrysty tym kóp berdi. Oǵan qosa, keı kezde naýqastardyń ózderi de tegin dári-dármekti almaı ketedi. Al onyń bári - bıýdjettiń qarjysy. Búginde aqparattyq júıe arqyly naýqastardyń naqty tizimi jasaldy. Sonyń arqasynda 14,5 mlrd teńge únemdelip otyr. Sebebi artyq tapsyrys jasalmaıdy.

«Jalpy, bir jyldyń ishinde biz 38 mıllıard teńgeni únemdedik. Buryn ol aqsha qaıda ketti? Qazir onyń bárin Bas prokýratýra jáne basqa da memlekettik organdar tekserip jatyr», - dep atap kórsetti E.Birtanov.