Dári-dármek shyǵaratyn zaýyttar negizinen 2013-2014 jyldary iske qosylatyn bolady

Búgin Astanada «Qazaqstan FarmMedIndýstrııa» qaýymdastyǵynyń músheleri, farmatsevtıkalyq kásiporyn dırektorlary bas qosty. Onda Elbasynyń otandyq dári-dármek kólemin 50 paıyzǵa deıin jetkizý jónindegi tapsyrmasynyń oryndalý barysy men salanyń problemalary talqylandy.

«Farmatsevtıkalyq ónerkásipti damytýdyń 2010-2014 jyldarǵa arnalǵan salalyq baǵdarlamasyna kelsek, onda negizinen qurylysy salynatyn jáne jańartylatyn 26 zaýyt josparlanǵan. Osynyń ishinde 10 zaýyt 2010-2011 jyldary iske qosyldy. Alaıda, olardyń basym bóligi negizinen medıtsınalyq maqsattaǵy buıymdardy, onyń ishinde birrettik shprıtster, qan quıý apparattary, halattar men bahılalar sekildi zattardy ǵana quraıdy. Sondyqtan da, dárilik zattardy shyǵaratyn zaýyttardyń negizgi ınvestjobalary 2013-2014 jyldary júzege asa bastaıdy. «Romad» kompanııasy Azııa Damý Bankimen birlesip jańa zaýyt salýda», - dedi «Qazaqstan FarmMedIndýstrııa» qaýymdastyǵynyń prezıdenti Serik Sultanov.

Onyń aıtýynsha, memlekettik qoldaýdyń arqasynda farmatsevtıka salasyna sheteldik ınvestıtsııalar aǵyny da arta túsken. Máselen, Shymkenttegi «Hımfarm» AQ-ǵa Eýropa naryǵyna keńinen tanymal «Polfarm» kompanııasy kelip, olar qarajat qana emes, ózderiniń jańa tehnologııalaryn da engizýde. «Aýqymy jaǵynan úshinshi orynda turǵan «Global Farm» jaýapkershiligi shekteýli zaýytyna da strategııalyq ınvestor retinde iri túrik kompanııasy «Ábdı Ibrahım» kelip kirgen. Bul kompanııanyń álemniń 30 eline, onyń ishinde Eýropaǵa ónimin ótkizýdegi orny bólek ekendigin mamandar moıyndaıdy. Sondyqtan, Qazaqstanda óndiriletin dári-dármekter aldaǵy ýaqytta turǵyndardyń suranysyn qanaǵattandyryp qana qoımaı, Keden odaǵy aýqymyna da qanat jaıýǵa múmkindigi artpaq», - dedi S Sultanov.