Dári-dármek óndirisi: Alekseı Tsoı «Nobel» kompanııasymen memorandýmǵa qol qoıdy
Búgin Densaýlyq saqtaý mınıstri Alekseı Tsoı «Nobel Ilach Sanaı ve Tıdjaret Anonım Shırketı» kompanııasynyń ókilderimen onlaın-kezdesý ótkizdi.
Onyń barysynda QR Densaýlyq saqtaý mınıstrligi men sheteldik ınvestor arasynda «Nobel Almaty farmatsevtıkalyq fabrıkasy» AQ bazasynda Qazaqstan Respýblıkasynda dárilik preparattar óndirisin qurý boıynsha ınvestıtsııalyq jobany iske asyrý týraly ózara túsinistik memorandýmyna qol qoıyldy.
«Qujattyń maqsaty «SQ-Farmatsııa» JShS-men jasalǵan dárilik zattardy jetkizýdiń uzaq merzimdi sharty sheńberinde Qazaqstanda dárilik preparattar óndirisin qurý, «Nobel Almaty farmatsevtıkalyq fabrıkasy» AQ ınvestıtsııalyq jobasyn iske asyrý», - dedi A.Tsoı.
Mınıstr «Nobel» kompanııasy álemdegi eń iri farmatsevtıkalyq óndirýshilerdiń biri ekenin jáne QR Densaýlyq saqtaý mınıstrligi ekijaqty yntymaqtastyqqa zor mán beretinin atap ótti.
QR-da dárilik preparattar óndirisi boıynsha atalǵan ınvestıtsııalyq joba 2025 jylǵa deıin iske asyrylady dep josparlanǵan. Onyń sheńberinde 400-ge jýyq jańa jumys orny ashylmaq.
«Dárilik preparat óndirisi QR ekonomıkasyna aıtarlyqtaı úles qosady. Bul memorandým seriktestikke serpin berip, qoǵam densaýlyǵyn nyǵaıtýǵa sep bolady», - dedi A.Tsoı.
«Nobel» kompanııasy Dırektorlar keńesiniń tóraǵasy Hasan Ýlýsoı Qazaqstan Úkimetiniń qazirgi jáne bolashaqtaǵy ınvestıtsııalyq jobalarǵa tartylǵan sheteldik kompanııalarǵa degen senimine alǵysyn bildirdi.
«Investıtsııalyq joba boıynsha memorandým – bul Qazaqstanǵa degen senimniń kórinisi. Jańa óndiris joǵary tehnologııalardy paıdalana otyryp, bıotehnologııalyq preparattar shyǵarý josparlanyp otyrǵan alǵashqy óndiristik alań bolady»,- dedi Hasan Ýlýsoı.
Aıta keteıik, 2020 jylǵa arnalǵan Biryńǵaı dıstrıbıýtordyń tizimi boıynsha «Nobel Almaty farmatsevtıkalyq fabrıkasy» AQ uzaq merzimdi sharttar boıynsha 15,8 mlrd teńge somasyna dárilik zattardyń 91 ataýyn jetkizdi. 2020 jylǵa «Nobel Almaty farmatsevtıkalyq fabrıkasy» AQ-dan satyp alýdyń jalpy somasy 16,8 mlrd teńgeni quraıdy. 2021 jylǵa jalpy somasy 16,5 mlrd teńgege dárilik zattardyń 88 ataýyn jetkizýge uzaq merzimdi sharttarǵa qosymsha kelisim jasaldy.
