Dári-dármek baǵasyn negizsiz kóterýdiń 200-ge jýyq faktisi anyqtaldy

NUR-SULTAN. QazAqparat - Dárilik zattar baǵasyn negizsiz kóterýdiń 200-ge jýyq faktisi anyqtaldy. Bul týraly QR Sybaılas jemqorlyqqa qarsy is-qımyl agenttigi Parasattylyq departamentiniń dırektory Ǵanıjan Asanuly aıtty, dep habarlaıdy QazAqparat tilshisi.

«Dári-dármekterdi alypsatarlyq jaǵdaılaryn joıý maqsatynda elimizdiń barlyq óńirlerinde sybaılas jemqorlyqqa qarsy qyzmeti, «Adaldyq alańy» jobalyq keńseleri, arnaıy monıtorıngtik toptar, sondaı-aq azamattyq belsendilerinen jumys toptary quryldy. Atalǵan jumys toptary áleýmettik jelilerge jáne saıttarǵa tapshy dárilik zattardy satý jáne baǵany kóterý boıynsha habarlamalarǵa, aýrýhanalarda halyq úshin jasalǵan jaǵdaılarǵa qoǵamdyq monıtorıng júrgizýde, sondaı-aq dári-dármekti saqtaý jáne satý oryndaryna monıtorıng júrgizýde. Halyqpen keri baılanys ornatý úshin 8 702 000 2494 WhatsApp nómeri jumys isteıdi. Oǵan dárilik zattardyń baǵasyn kóterý faktileri boıynsha azamattardań 4500-den astam ótinishteri kelip túsken», - dedi ol agenttiktiń baspasóz qyzmeti alańynda ótken brıfıng barsynda.

Onyń atap ótýinshe, jumys toptary 1555 dárihanalarǵa, 102 dári qoımalaryna, 103 aýrýhana men emhanaǵa bardy. Nátıjesinde 200-ge jýyq buzýshylyq anyqtaldy.

«Negizgi buzýshylyqtardyń biri - dárilik zattardyń baǵasyn kóterý. Densaýlyq saqtaý mınıstrligi jylyna eki ret dárilerdiń shekti satý baǵalaryn bekitedi. Dárini shekti baǵadan asyryp satý buzýshylyq bolyp tabylady. Jaqynda jyl sońyna deıin áreket etetin dári-dármektiń jańa shekti baǵasy bekitildi. Azamattar olarmen dari.kz mobıldi qosymshasynyń kómegimen tanysa alady. Kez kelgen azamat baǵany kóterý faktisin anyqtaǵan jaǵdaıda, sol qosymsha arqyly shaǵym jibere alady», - dedi Ǵanıjan Asanuly.