Dári-dármek baǵasy boıynsha qaıda shaǵymdaný kerek
NUR-SULTAN. QazAqparat – Sońǵy eki kúnde Nur-Sultan qalasynda 15 dári-dármek alypsatarlyǵy tirkeldi. Bul týraly elorda ákimi Altaı Kólginov aıtyp berdi, dep habarlaıdy QazAqparat tilshisi.
«Dárilik preparattar boıynsha óte kóp shaǵym túsýde. Memleket basshysynyń tapsyrmasymen quqyq qorǵaý organdarymen birlesip, alypsatarlyqtyń jolyn kesetin mobıldi top qurdyq. Buǵan deıin de azamattarǵa aıtqan edik, taǵy qaıtalap aıtaıyn, dárihanalardaǵy baǵalardyń sharyqtaýy boıynsha 109 nómirine habarlasý kerek. Mobıldi top máseleniń mán-jaıyn anyqtaıdy», - dedi ákim Ortalyq kommýnıkatsııalar qyzmetinde ótken brıfıngte.
Onyń aıtýynsha, dárihanalarmen bir qolǵa shekteýli túrde dári-dármek satý týraly ýaǵdalastyq ornaǵan.
«Paratsetamol bolmasa da, onyń balamalary bar. Dárilerdi kóptep satyp alýdyń aldyn alý úshin shekteýler engizildi. Aýrýdan saqtaný úshin úıip-tógip dári alatyndar bar, bul ýaqytta shyn muqtaj adamǵa dári qalmaýy múmkin. Bul sheshimdi qalalyq dárihanalarmen jáne jetkizýshilermen birlesip qabyldadyq», - dedi A. Kólginov.
Arnaıy mobıldik top dárihanalarda tekserý júrgizip, sońǵy eki kúnde 15 jaǵdaıdy tirkegen.
«Sońǵy eki kúnde aýqymdy suranysty paıdalanyp, dári-dármekti alyp-satqan 15 jaǵdaı tirkeldi. Ol úshin 8 adam jaýapqa tartylady. Onyń bireýi zańǵa sáıkes jazalandy. Biz bul máseleni baqylaýǵa alamyz», - dedi A. Kólginov.
