Dárihanalardy jappaı tekserý: 200-ge jýyq adam jaýapqa tartyldy
ASTANA. KAZINFORM — El aýmaǵynda jospardan tys «Dármek» respýblıkalyq jedel-profılaktıkalyq is-sharasy ótkizildi, dep habarlaıdy Polisia.kz.
«Operatsııanyń negizgi maqsaty — esirtkiniń zańdy aınalymy salasyndaǵy quqyq buzýshylyqtar men dárihanalyq nashaqorlyqtyń taralýyna jol bermeý. Reıdtik is-shara kezeńinde prekýrsorlar men medıtsınalyq preparattardy qoldanatyn myńnan astam uıym, onyń ishinde 721 dárihana, 77 qoıma, 159 emdeý-profılaktıkalyq mekemeci jáne 129 ónerkásiptik kásiporyn tekserildi. Aldynda ótken „Dármek“ jedel-aldyn alý is-sharasymen salystyrǵanda anyqtalǵan ákimshilik quqyq buzýshylyqtardyń 30%-ǵa óskeni baıqalady. Úsh myń tonnadan astam prekýrsorlardyń aınalymy shekteldi. Atap aıtqanda, bul sıntetıkalyq esirtkilerdi óndirýde qoldanýǵa bolatyn qos maqsattaǵy taýarlar. Ákimshilik jaýapkershilikke 191 laýazymdy tulǵa tartyldy, onyń ishinde 108 medıtsına qyzmetkeri. Saqtaý sharttaryn buzǵany úshin 44 myń tabletka jáne 14 myń ampýla psıhoaktıvtik preparattar aınalymy shekteldi. Esirtki quraldarymen jumys isteý salasynda bes qylmystyq quqyq buzýshylyq anyqtaldy, — dedi ІІM esirtki qylmysyna qarsy is-qımyl komıteti tóraǵasynyń orynbasary Qýandyq Áljanov.
Mysaly, Batys Qazaqstan oblysyndaǵy ónerkásiptik obektileriniń birin tekserý barysynda lıtsenzııasyz paıdalanylǵan 14 tonnadan astam tuz qyshqyly anyqtalyp tárkilendi. Abaı oblysyndaǵy medıtsınalyq uıymdy tekserý kezinde esirtki quraldaryn saqtaý jáne joıý qaǵıdalaryn buzý deregi anyqtaldy, onda 137 ampýla psıhoaktıvtik zattar tárkilendi. Farmatsevtke qatysty qylmystyq is qozǵaldy.
«Esirtki quraldary, psıhotroptyq zattar men prekýrsorlar aınalymymen aınalysatyn zańdy tulǵalarǵa baqylaýdaǵy zattardy tasymaldaý, saqtaý, paıdalaný jáne satý normalaryn saqtaý qajet ekenin aıtamyz. ІІM esirtkiniń zańdy aınalymy salasyndaǵy zańnamada belgilengen talaptardy buzǵany úshin Qylmystyq kodekstiń 303-baby boıynsha qylmystyq jaýaptylyq kózdelgenin eske salady, bul 600 myń teńgege deıingi mólsherde aıyppul nemese 40 táýlikke deıin qamaýǵa alý túrindegi jaza», — dedi Qýandyq Áljanov.
