Dárihanalar men dúkender zorlyq-zombylyq qurbandary úshin pana bola alady
ASTANA. KAZINFORM — Quryltaı depýtaty Larısa Lı Qazaqstanda «PANA» áleýmettik jobasynyń qaýipsiz nysandar jelisin qurýdy usyndy. Munda turmystaǵy zorlyq-zombylyq qurbandary ózderine pana taýyp, kómek ala alady.
Depýtattyń aıtýynsha, qabyldanǵan sharalarǵa qaramastan, Qazaqstanda turmystaǵy zorlyq-zombylyq qurbandarynyń sany joǵary kúıinde qalyp otyr. Onyń ústine, qorǵaý tetikteri tek oqıǵa oryn alǵannan keıin ǵana iske qosylady, ıaǵnı tıimdi aldyn alý sharasy bola almaı tur.
— Zorlyq-zombylyq nemese qýdalaý bolǵan sátte jábirlenýshide qutylyp ketýi úshin nebári alǵashqy birneshe mınýt qana bolady. Eseńgiregen kúıde, qolynda telefony nemese aqshasy joq adam resmı aryz jazý úshin alystaǵy polıtsııa bólimshesine júgirip bara almaıdy. Eger dereý bas saýǵalaıtyn jer bolmasa, jábirlenýshi tyǵyryqqa tireledi, — dedi Larısa Lı Quryltaıdyń jalpy otyrysynda jarııalaǵan depýtattyq saýalynda.
Osy oraıda depýtat PANA dep atalatyn qoǵamdyq bastamany usyndy. Joba aıasynda «qaýipsiz orta» jelisi qurylmaq. Bul — jaqyn jerde ornalasqan, qaýipsiz «senim núkteleriniń» jelisi, ıaǵnı shaǵyn dúkender, dárihanalar jáne múlik ıeleri birlestigi (MIB) ózderin qaýipsiz nysan retinde usyna alady. Sonymen qatar, atalǵan nysandar jobaǵa qatysýǵa daıyn ekendikterin rastap otyr.
— Áıelder nemese balalar qazirgi turǵan jerinen 60 sekýndtyq qashyqtyqta ornalasqan dúkenderde nemese dárihanalardyń esiginde «PANA» geolokatsııalyq belgisi bar nysandy baıqasa, ishke kirip panalaı alady. «Úsh qadam» hattamasyna sáıkes, qyzmetkerler olardy qaýipsiz ishki bólmege ornalastyryp, qaýipti adamnan oqshaýlaıdy, sonymen qatar alǵashqy kómek kórsetip, shuǵyl túrde tıisti vedomstvolarǵa habarlasady. Bul joba memlekettik bıýdjetten bir tıyn da jumsamaı-aq, ınfraqurylym tapshylyǵy máselesin sheshýge baǵyttalǵan. Bul óz kezeginde qurylysyna nemese kútip ustaýyna memleket tarapynan eshqandaı shyǵyn talap etilmeıtin, paıdalanýǵa daıyn ári tegin jeli, — dedi depýtat.
Larısa Lıdiń sózine qaraǵanda, PANA jobasyn prokýratýrany, Іshki ister mınıstrligin, «Januıa» otbasyn qoldaý ortalyǵyn jáne daǵdarys ortalyqtaryn biriktiretin FSM Social platformasymen de yqpaldastyrý qajet bolady.
Depýtat búginde Astana, Kókshetaý jáne Temirtaý qalalary bul jobany pılottyq tártipte iske qosýǵa daıyn ekenin jetkizdi.
Aıta keteıik, jaqynda depýtat Aıjan Aımaǵanova Іshki ister mınıstri Erjan Sádenovtiń atyna saýal joldap, «Elektrondy qorǵanys aımaǵy» pılottyq jobasyn ázirleýdi usyndy.
