Darhan Jazyqbaı: Jastardyń boıyndaǵy kúsh-qýat pen qabiletti elge qyzmet etýge baǵyttaý – basty maqsatymyz
ASTANA. KAZINFORM – Memlekettik qyzmet isteri agenttiginiń tóraǵasy Darhan Jazyqbaı Prezıdent janyndaǵy Memlekettik basqarý akademııasynda jastardyń memlekettik qyzmetke kelýine jasalǵan múmkindikterdi túsindirý, olarǵa ádilettilik pen adaldyq, azamattyq sana qundylyqtaryn, otansúıgishtik qasıetterdi nasıhattaý maqsatynda elordanyń jastarymen kezdesti.
«Ádiletti Qazaqstan – Adal Azamat» taqyrybynda ótken is-sharaǵa mektep oqýshylary men joǵary oqý oryndarynyń stýdentteri, «Jas memlekettik qyzmetshiler mektebiniń» tyńdaýshylary, sonymen qatar beınekonferentsbaılanys arqyly óńirlerdiń jastary qatysty.
Darhan Jazyqbaı memlekettik qyzmet salasyn damytý jumystary aıasynda «Ádiletti Qazaqstan – Adal azamat» qaǵıdattaryna sáıkes ashyqtyq, ádildik, otansúıgishtik qasıetterge basa kóńil bólinip otyrǵanyna toqtalyp, jastarǵa memlekettik qyzmetke kelýge tolyq múmkindikter jasalǵanyn aıtty.
«Memleket basshysy Qasym-Jomart Toqaev «Qazaqstan – jas ári jastardyń memleketi! Jastarymyz – damýdyń qozǵaýshy kúshi. Barlyq memlekettik organdardyń mindeti – jastardyń ózin ózi jaqsy tanytýyna jaǵdaı jasaý jáne olardyń oń bastamalaryna qoldaý kórsetý» degen bolatyn. Eńbekqor, otanǵa qyzmet etýdi paryz sanaıtyn jastar – el damýynyń qozǵaýshy kúshi. Halqymyz qashanda jastarǵa úlken úmit artqan. Agenttik daryndy, bilimdi, bastamashyl jastardy memlekettik qyzmetke tartýdy turaqty jolǵa qoıýda. Sol arqyly memlekettik qyzmetshilerdiń jańa býynyn qalyptastyrýdamyz. Jastardyń boıyndaǵy kúsh-qýat pen qabiletti elge qyzmet etýge baǵyttaý bizdiń basty maqsatymyz. Bolashaqta memlekettik qyzmetke qyzyǵýshylyq tanytyp, osy joldy tańdasańdar týǵan otanymyz Qazaqstandy kórkeıtýge tikeleı úles qosa alasyńdar» ,- dedi Darhan Jazyqbaı.
Agenttik zaman talabyna saı tsıfrlandyrý arqyly kadrlardy irikteýdiń ashyq jáne ádil júıesin qalyptastyrý maqsatynda «eQyzmet.gov.kz» saıtynda memlekettik qyzmetke qabyldaýdyń onlaın júıesin engizdi.
Sońǵy ózgeristerge sáıkes joǵary oqý oryndaryn jaqsy kórsetkishpen (GPA 3,33-ten joǵary) bitirgen 430-dan astam túlek aýdandyq jáne aýyldyq jerlerdegi tómengi laýazymdarǵa konkýrssyz qabyldandy. Aımaqtarda memlekettik qyzmetshi bolýǵa yntaly jastardy anyqtaý, olarǵa memlekettik qyzmettiń erekshelikterin túsindirý jáne qyzyǵýshylyǵyn arttyrý jumystaryn júrgizetin jas memlekettik qyzmetshilerdiń mektepteri jumys jasaýda.
Memlekettik apparatqa qajetti daryndy jastardy irikteý úshin Prezıdenttik jastar kadr rezervi jáne Óńirlik kadr rezervi qalyptastyryldy.
Іs-shara barysynda jastar 2024-2029 jyldarǵa arnalǵan memlekettik qyzmetti damytýdyń jańa tujyrymdamasy aıasynda salaǵa qajetti jas talanttardy yntalandyrýdy kózdeıtin, mektep jáne ýnıversıtet deńgeıinde erte kásiptik baǵdarlaý ınstıtýtyn qurý bastamasyna qyzyǵýshylyq tanytty.
Jastar Agenttik tóraǵasyna ózderin qyzyqtyrǵan suraqtaryn qoıyp, pikir almasty. Darhan Jazyqbaı «Adal azamat» ıdealyna tán qasıetterdiń jastarymyz úshin mańyzdylyǵyna toqtalyp, olarǵa memleketshil bolýdyń, otan aldyndaǵy jaýapkershilik pen paryzdyń qashanda bıik turý qajettiligin aıtty.
Kezdesý sońynda jastarǵa memlekettik qyzmetshilerdiń biliktiligin aryttyrýǵa arnalǵan tsıfrlyq kovorkıng zaly, medıa-stýdııa, aqparatty 3D-golografııalyq dárister ótkiziletin gologramma zaly, murajaı jáne kitaphana jumysymen tanystyrý úshin arnaıy eksýrsııa uıymdastyryldy.