Darhan Jazyqbaı Mańǵystaý jastaryna memqyzmetke ornalasý joldaryn túsindirdi
Memlekettik qyzmet isteri agenttiginiń tóraǵasy Darhan Jazyqbaı Mańǵystaý oblysynda jumys saparymen bolyp, óńir basshylyǵy, jergilikti memlekettik qyzmetshiler jáne jastarmen kezdesý ótkizdi, dep habarlaıdy Kazinform.
Oblys aktıvimen kezdesýde MQІA basshysy agenttiktiń memlekettik qyzmet salasyndaǵy zańnamalyq bastamalarynyń júzege asýy, qyzmet alýshylardyń zańdy quqyqtaryn qorǵaý jáne memlekettik apparatty bıýrokratııadan aryltý sharalary týraly aıtty.
Ol memlekettik qyzmetti túbegeıli jańǵyrtýdyń basty maqsaty – ashyq jáne adamǵa baǵdarlanǵan memlekettik apparat qalyptastyrý ekenin atap ótti.
Agenttik tóraǵasy «E-qyzmet» júıesin jetildirý jumysyna toqtalyp, onyń qoldaný aıasyn keńeıtýge múmkindik jasalǵanyn aıtty.
Іrikteýdiń tsıfrlyq formaty iske qosylǵan sátten bastap 436 adam ártúrli memlekettik laýazymǵa taǵaıyndaldy.
Sh. Esenov atyndaǵy Kaspıı tehnologııalar jáne ınjınırıng ýnıversıtetinde óńirdiń jastarymen ótken kezdesýde MQІA tóraǵasy memleketke eldiń damýyna óz úlesin qosa alatyn kreatıvti jastar qajet ekendigine toqtaldy.
Onyń aıtýynsha, jastardy memlekettik qyzmetke tartýdyń tıimdi quraldarynyń biri – Prezıdent jastar kadr rezervine irikteý.
Kezdesýge qatysýshylar memlekettik qyzmettegi jastarǵa arnalǵan ózge de múmkindiktermen tanysty.
Darhan Jazyqbaı joǵary oqý ornyn úzdik bitirgen (GPA 3,33-den joǵary) túlekter úshin aýdandyq jáne aýyldyq jerlerdegi tómengi laýazymǵa tikeleı taǵaıyndaý múmkindigi týraly agenttik bastamasyna sáıkes 78 túlek memlekettik qyzmetke taǵaıyndalǵanyn aıtty.
Joǵary oqý ornynyń túlegi memlekettik qyzmetke konkýrssyz jumysqa ornalasý boıynsha óz tájirıbesimen bólisip, bul jańashyldyqtyń jas qazaqstandyqtar úshin mańyzyn atap ótti.
Qatysýshylar memlekettik qyzmetke kirý máselesine qyzyǵýshylyq tanytyp, jasandy ıntellekt múmkindikterin qoldaný, memlekettik apparatty odan ári damytý boıynsha suraqtaryn qoıdy.
Kezdesý aıasynda agenttik tóraǵasy Jas memlekettik qyzmetshiler mektebiniń qatysýshylaryna, sondaı-aq memlekettik qyzmet salasyndaǵy jobalardy iske asyrýǵa belsendi qatysqan tulǵalarǵa alǵys hat tabystady.
Jumys sapary barysynda Darhan Jazyqbaı jergilikti halyqqa memlekettik qyzmetterdiń keń spektri kórsetiletin Munaıly aýdanynyń halyqqa qyzmet kórsetý ortalyǵyna bardy.
Agenttik tóraǵasy qoǵam men memlekettiń ózara is-qımylynyń negizgi elementteriniń biri – memlekettik qyzmet sapasyn arttyrýdyń mańyzyna toqtalyp, memlekettik qyzmet kórsetý merzimi men qaǵıdalaryn, qyzmet alýshylardyń quqyǵyn saqtaýdy, aqparattyń qoljetimdiligin jáne sapaly keri baılanysty qamtamasyz etý qajettigine nazar aýdardy.
Sondaı-aq MQІA Mańǵystaý oblysy boıynsha departamenti jáne QR Prezıdenti janyndaǵy Memlekettik basqarý akademııasy fılıalynyń ujymdarymen kezdesýler ótti.
