Darhan Satybaldy jańa shaǵynaýdandardaǵy qasbettik jaryqtandyrý jumystarymen tanysty
ALMATY. KAZINFORM — Almatyda turǵyn úı aýmaqtaryndaǵy jaryqtandyrýdy jaqsartý jáne qaýipsiz qala keńistigin qalyptastyrý jumysy jalǵasyp jatyr. Qala ákimi Darhan Satybaldy Naýryzbaı aýdanyna baryp, sáýlettik-dekoratıvtik jaryqtandyrý jáne kórkeıtýdiń jańa nysandaryn qarady.
Alǵash bolyp Shuǵyla shaǵynaýdanyndaǵy «Arbat — Ulyqbek» jańa júrginshiler aımaǵy tanystyryldy. Joba kórkeıtýge arnalǵan bıýdjettik baǵdarlamalar (HQB) aıasynda júzege asyrylyp, aýdan turǵyndary úshin qolaıly jáne qaýipsiz qoǵamdyq keńistik qalyptastyrýǵa baǵyttalǵan.
Aımaqtyń jalpy uzyndyǵy — 370 metr. Munda júrginshi joldary (2 myń kýb. m) jáne velosıped jolaqtary (1200 kýb. m), balalar oıyn alańy, basketbol alańy, vorkaýt-aımaǵy jáne shaǵyn amfıteatr ornatylǵan. Sondaı-aq shaǵyn sáýlettik formalar, kóshe jıhazy, avtomatty sýarý júıesi jáne jaryqtandyrý elementteri qarastyrylǵan. Kógaldandyrý aıasynda 200 iri aǵash jáne 4500 buta otyrǵyzyldy, 30 oryndyq, 30 qoqys jáshigi jáne 28 shaǵyn sáýlettik forma ornatyldy.
Almaty ákimi shaǵynaýdandardaǵy jergilikti qoǵamdyq keńistikterdi damytý mańyzdy ekenin atap ótti.
— Mundaı aýmaqtar turǵyndar úshin demalys pen serýenniń, kezdesý men qarym-qatynastyń jaıly ári qaýipsiz ortasyn qalyptastyrady. Biz qalanyń ár aýdanyn kezeń-kezeńimen kórkeıtýdi jalǵastyramyz, — dedi Darhan Satybaldy.
Kelesi nysan — Shuǵyla turǵyn úı keshenindegi sáýlettik-dekoratıvtik jaryqtandyrý. Jumystar qala boıynsha qasbetterdi jaryqtandyrý baǵdarlamasy aıasynda istelgen.
Sondaı-aq jaryqtandyrý Alataý jáne Sabdenov kósheleri boıyndaǵy toǵyz turǵyn úıge ornatylǵan. Qoldanylǵan zamanaýı energııa únemdeıtin jabdyqtar qasbetter men aýla aýmaqtaryn birkelki jaryqtandyrýdy qamtamasyz etedi. Mundaı jobalar túngi ýaqytta qaýipsizdikti jáne jaılylyqty arttyrýmen qatar, jańa turǵyn aýdandardyń estetıkalyq kelbetin qalyptastyrady.
Jumys saparynyń sońǵy núktesi Raıymbek dańǵyly boıyndaǵy «Nurly Dala» turǵyn úı kesheni boldy. Munda da qasbettik jaryqtandyrý tolyq aıaqtalǵan. Joba segiz turǵyn úıdi qamtıdy, sondaı-aq tıimdi tehnologııalar qoldanylyp, elektr qýatyn únemdep, júıelerdiń uzaq merzimdiligin qamtamasyz etedi.
Darhan Satybaldy qalalyq keńistiktiń estetıkasy turǵyndar jaılylyǵynyń mańyzdy quramdas bóligi ekenin aıtty.
— Biz ınjenerlik ınfraqurylymmen qatar, aýdandardyń syrtqy kelbetine de nazar aýdaramyz. Qasbettik jaryqtandyrý qalany zamanaýı etedi jáne keshki Almatyny jandandyrady, — dep atap ótti ákim.
Aralaý barysynda qala ákimi aýdandardy keshendi kórkeıtýdi jalǵastyrýdy, jobalardyń sapasy men merzimin qamtamasyz etýdi, sondaı-aq sáýlettik jaryqtandyrý júıeleriniń tehnıkalyq jaǵdaıyna baqylaýdy kúsheıtýdi tapsyrdy.