Prezıdentke Almatynyń áleýmettik-ekonomıkalyq ahýaly men negizgi damý baǵyttary tanystyryldy
ASTANA. KAZINFORM – Memleket basshysy Almaty qalasynyń ákimi Darhan Satybaldyny qabyldady, dep habarlaıdy Aqordanyń baspasóz qyzmeti.
Qasym-Jomart Toqaevqa qalanyń áleýmettik-ekonomıkalyq ahýaly jáne negizgi damý baǵyttarynyń iske asyrylýy týraly baıandaldy.
Darhan Satybaldynyń aıtýynsha, qala ekonomıkasynda oń dınamıka baıqalady: 2025 jyldyń qorytyndysy boıynsha ósim 6,5 paıyzdy qurady, al bıylǵy qańtar-aqpan aılarynda qysqa merzimdi ekonomıkalyq ındıkator 9,4 paıyzǵa jetti. Negizgi kórsetkishter ónerkásip, qurylys, ólik jáne saýda salalary esebinen quralady.
Shahardyń ınvestıtsııalyq portfeli 2,8 trıllıon teńgeden asady. «Almaty» ındýstrııalyq aımaǵy men «Alataý» arnaıy ekonomıkalyq aımaǵyna jańa jobalardy tartý maqsatynda keńeıtý jumystary júrgizilip jatyr.
Almaty elimizdiń IT sektorynda jetekshi ról atqarady. Tsıfrlandyrý aıasynda Almaty AI Park qalyptasyp, jasandy ıntellekt negizindegi beınemonıtorıng pen taldaý júıesi damyp keledi.
Týrızm men taý klasterin órkendetý jalǵasady. Bıyl «Shymbulaqty» jańǵyrtý, irgeles shatqaldardy damytý jumystary bastalady. Jobalardy iske asyrý 2029 jylǵy Qysqy Azııa oıyndaryna daıyndyq sharalarymen birge júrgiziledi. Sonymen qatar qonaqúı ınfraqurylymy keńeıtilip jatyr. Bas jospardy túzetý aıaqtalýǵa jaqyn. Onda qala ishindegi ortalyq modelin damytý jáne taý bókterindegi aýmaqta qurylysqa shekteý engizý kózdelgen.
Qoǵamdyq kólikti ilgeriletý, sonyń ishinde BRT jelisin keńeıtý, metro qurylysy jáne jańa transporttyq sheshimderdi pysyqtaý negizgi basymdyq sanalady. Injenerlik ınfraqurylym jáne sýmen jabdyqtaý júıesi jańartylyp jatyr. Ekologııalyq kún tártibine erekshe nazar aýdarylyp, jylý kózderin jańǵyrtý jáne shyǵaryndylardy azaıtý sharalary qolǵa alyndy. Kezdesý sońynda Memleket basshysy Almaty AI Park jobasyn jedeldetý, sondaı-aq LRT jáne SkyTrain júıelerin engizý jumystaryn jandandyrý boıynsha birqatar tapsyrma berdi.
Osyǵan deıin Prezıdent Qazaq ulttyq ýnıversıtetiniń ǵylymı áleýetimen tanysqan bolatyn.