Darhan Satybaldy QR Prezıdenti ákimshiligi basshysynyń birinshi orynbasary bolyp taǵaıyndaldy

ASTANA. KAZINFORM - Memleket basshysynyń Jarlyǵymen Darhan Amangeldiuly Satybaldy Qazaqstan Respýblıkasy Prezıdentiniń Ákimshiligi Basshysynyń birinshi orynbasary bolyp taǵaıyndaldy, ol burynǵy atqarǵan laýazymynan bosatyldy.

Bul týraly Aqordanyń baspasóz qyzmeti habarlady. 

Darhan Satybaldy 1974 jyly Ońtústik Qazaqstan oblysynda týǵan. S.Seıfýllın atyndaǵy Aqmola aýylsharýashylyǵy ınstıtýtyn, Qazaq gýmanıtarlyq zań ýnıversıtetin bitirgen. Ekonomıka ǵylymdarynyń kandıdaty.

Eńbek jolyn 1996 jyly Ońtústik Qazaqstan oblysynyń Keles aýdanynyń «Keles» kommýnaldyq kásipornynda bastaǵan.

2000-2006 jyldary Qarjy mınıstrliginde, Prezıdenttiń Іs basqarmasynda ártúrli laýazymdarda qyzmet atqarǵan.

2007-2010 jyldary Bilim jáne ǵylym mınıstrliginiń Bıýdjet jáne Qarjy departamentteri dırektorynyń orynbasary, Ǵylym komıteti tóraǵasynyń orynbasary bolǵan.

2010 jyly Ulttyq qaýipsizdik komıtetiniń departament bastyǵy laýazymyna taǵaıyndalǵan.

2011-2013 jyldary Premer-Mınıstr Keńsesiniń
Áleýmettik-ekonomıkalyq bólimi meńgerýshisiniń orynbasary laýazymyn atqarǵan.

2013 jyly Shymkent qalasynyń ákimi bolyp taǵaıyndalǵan.

2015-2017 jyldary Ońtústik Qazaqstan oblysy ákiminiń birinshi orynbasary laýazymyn atqarǵan. Parlament Senatynyń depýtaty bolyp saılanǵan.

2019 jylǵy naýryzdan bastap Qazaqstan Respýblıkasynyń Ózbekstan Respýblıkasyndaǵy Tótenshe jáne Ókiletti Elshisi.

2022 jylǵy 31 tamyzdan Túrkistan oblysynyń ákimi bolyp taǵaıyndaldy.

«Eren eńbegi úshin» medalimen, «Qurmet» ordenimen marapattalǵan.

Osyǵan deıin Qazaqstannyń birqatar memlekettegi elshileri taǵaıyndalǵanyn habarladyq.